Нью-Йорк полиция бошқармаси 15 апрель, сешанба куни мусулмон жамоатчилиги устидан эҳтимолий террорчилик ҳаракатларининг олдини олиш учун назорат олиб бориш билан шуғулланган бўлинмани тарқатиб юбориш ҳақидаги қарорни эълон қилди. Бу ҳақда «ИТАР-ТАСС» хабар берди.
2011 йил ёзида Associated Press агентлигининг журналистлик тадқиқотлари ёрдамида Нью-Йорк полициясининг мусулмонларни яширинча кузатиши маълум бўлган эди.
Марказий разведка бошқармаси билан ҳамкорликда полиция мусулмонлар ҳаётининг барча жабҳаларини қамраб олувчи кузатув дастурини ишлаб чиқишган. Мусулмонлар қаерда овқатланиши, харидлар қилиши, ишлаши, намоз ўқиши ҳақидаги маълумотлар базаси яратилган. Бундан ташқари, полиция мусулмонлар кварталларида суҳбатларни тинглаб, олинган маълумотлар бўйича кунлик ҳисоботлар тузган.
Нью-Йорк полицияси кўпгина ҳуқуқни ҳимоя қилиш ташкилотлари томонидан кескин танқидга учраб, уларнинг бундай ҳаракатлари ноқонуний, дея эътироф этилди. Собиқ мэр Майкл Блумберг бошчилигидаги шаҳар ҳукумати мусулмонлар устидан назорат олиб борилишини тан олишга мажбур бўлди, бироқ унинг қонуний экани ва бир неча марта террорчилик ҳаракатларининг олдини олганини таъкидлади.
Нью-Йоркнинг айни пайтдаги мэри Билл де Блазио сайловолди кампаниялари чоғида ушбу дастурни ёпишга ваъда берган эди.
Изоҳ (0)