Пойтахтдаги «Локомотив» истироҳат боғида «Катапульта» аттракционининг троси узилгани ҳақидаги гаплар рад этилди. Истироҳат боғи маъмурияти вакили боғда ҳеч қандай ҳалокат содир бўлмаганига ишонтирди, деб ёзади Gazeta.uz.
«Ҳар куни боғ очилишидан аввал оператор, слесарь, электрик, механик ва эксплуатация мудиридан иборат комиссия аттракционларни назорат қилади ва улардан фойдаланиш мумкинлиги ёки, аксинча, мумкин эмаслиги тўғрисида ёзма рухсат беради», — деб таъкидлади «Локомотив» вакили.
Истироҳат боғининг Facebook’даги саҳифасида берилган хабарда қайд этилишича, «Катапульта» аттракционида икки хил хавфсизлик тизими кўзда тутилган.
«Трос ва арқонларнинг қандай тузилгани ҳақида тасаввурга эга бўлмаган инсонларга интернетда уларнинг тузилиши, узилиши ёки дарз кетиши мумкинлиги ва ейилиш даражаси ҳақида ўқишни тавсия этамиз», — дейилади хабарда.
Эслатиб ўтамиз, «Зафар Диёр» боғи ўрнида ташкил этилган янги «Локомотив» истироҳат боғининг очилиш маросими 21 март куни ўтказилган эди.
Изоҳ (0)