Лондон ташқарисидаги сартарошхона хўжайини Мо Наббах Шимолий Корея етакчиси Ким Чен Ин қиёфасидан реклама сифатида фойдаланди. Бу ҳақда Itv.com хабар берди.
Маълум бўлишича, Наббах апрель ойининг бошида Ким Чен Ин сурати туширилган постерни салон витринасига жойлаган. Постерда «Сочингиздан кўнглингиз тўлмаяптими? Апрелда эркаклар сочини кесиш 15% чегирма билан» шиорини ўқиш мумкин.
Икки-уч кун ўтиб сартарошхонадан бир неча километр масофада жойлашган КХДР элчихонаси вакиллари етиб келишди ва реклама плакатини олиб ташлашни сўрашди. Бироқ муассаса хўжайини бундан бош тортди.
«Мен уларга биз Шимолий Кореяда эмас, Буюк Британияда эканлигимизни эслатиб қўйдим», — деди Наббах журналистларга берган интервьюсида. У ўз ҳаракатини нотўғри деб ҳисобламайди ва реклама кампанияси натижаларидан мамнун: унинг сартарошхонаси ва Ким Чен Инли плакати шаҳарнинг диққатга сазовор жойига айланди.
Лондон полицияси ҳар иккала томон билан гаплашгани, бироқ улар ўртасида келишув ўрната олмаганини таъкидлади. КХДР элчихонаси эса ҳодисани изоҳлашдан бош тортди.
Изоҳ (0)