Ўзбекистонда хизмат кўрсатган артист Севара Назархон Россия Биринчи каналидаги «Точь-в-точь» («Худди ўзгинаси») шоусининг еттинчи турида «Тунги снайперлар» («Ночных снайперов») гуруҳининг солисти Диана Арбенина қиёфасида саҳнага чиқди. Бу ҳақда 12uz.com хабар берди.
Навбатдаги босқичда Севара Диана Арбенинанинг «Сен менга атиргуллар совға қилардинг» («Ты дарила мне розы») ашуласини ижро этди.
Ҳакамлар ҳайъати аъзолари: Леонид Ярмолник, Любов Казарновская ва Геннадий Хазанов Севаранинг чиқишини аъло даражада деб баҳолади ва максимал 15 балл қўйди. Геннадий Хазанов ўзбек хонандасига баҳо қўяр экан шундай деди:
Севара шоунинг бошланишида «Мен фақатгина қўшиқчиман, актриса эмасман», — деган эди. Бугун у ҳақиқий актрисага айланди.Яна бир ҳакамлар ҳайъати аъзоси Максим Аверин Севарани Диана Арбенинадан кўра кўпроқ хонанда Земфирага ўхшаб қолган, деб ҳисоблади ва чиқишини тўрт балл билан баҳолади. Кейинроқ, бетараф ҳакам — Россия халқ артисти Лев Лесченко Севаранинг ижросини 5 баллга лойиқ, деб топди ва у жами 24 балл йиғди.
Эслатиб ўтамиз, Севара Назархон мазкур шоунинг биринчи раундида 23 очко билан бешинчи ўринни, иккинчи босқичида 21 очко билан тўққизинчи ўринни, учинчи турида 25 балл тўплаб, тўртинчи ўринни эгаллаган эди. Тўртинчи раундда Севара Дмитрий Колдун ва Ирина Дубсова билан бир хил — 24 балл, бешинчи босқичда 23 балл, олтинчи турда эса 24 балл йиғган эди.
Изоҳ (0)