Самарқандда умумтаълим мактаблари ўқувчилари ўртасида ўтказилаётган «Ораста қизлар» кўрик-танловининг вилоят босқичи бўлиб ўтди. Бу ҳақда ЎзА хабар берди.
Танлов Самарқанд вилояти хотин-қизлар қўмитаси ҳамда халқ таълими бошқармаси ҳамкорлигида ташкил этилди.
Тадбир давомида вилоятнинг барча туман ва шаҳарларидан келган жамоалар «Оммавий маданият» мафкуравий таҳдиди – миллат маънавияти кушандаси», «Интернет, замон ва биз», «Ватаним маҳаллам ва оиламдан бошланади», «Остонаси гулзор хонадон – фариштали хонадон», «Соғ танда – соғлом ақл» каби мавзуларда саҳна кўринишларини намойиш этди. Ўзаро савол-жавобларда билимларини яна бир бор синовдан ўтказди.
Паяриқ тумани ўқувчи-қизлари ғолибликни қўлга киритиб, танловнинг республика босқичига йўлланма олди.
— Вилоятдаги барча умумтаълим мактабларида «Ораста қизлар» тўгараги фаолият кўрсатмоқда, — дейди вилоят халқ таълими бошқармаси бошланғич хотин-қизлар қўмитаси раиси Нигора Холиқова. — Бу орқали ўқувчи қизлар ўртасида соғлом турмуш тарзини тарғиб этиш, уларнинг оила ва рўзғор тутуми, қадриятларимиз ҳақидаги тушунчаларини бойитиш, миллий ҳунармандчилик анъаналарини ўргатиш ишлари олиб борилмоқда. Мазкур танлов ҳам уларнинг бу борадаги билим ва кўникмаларини намоён этишига хизмат қилмоқда.
Изоҳ (0)