АҚШ Марказий разведка бошқармаси (МРБ) директори Жон Бреннан дам олиш кунларини Киевда ўтказди. Оқ уй матбуот котиби Жей Карнининг айтишича, Бреннан Киевга Европага саёҳати доирасида ташриф буюрган. Бу ҳақда Vesti.ru хабар берди.
Карнининг қўшимча қилишича, АҚШ Россиянинг Киевга нисбатан ҳаракатларини «баҳолашда давом этмоқда». «Вашингтон бу борада ўз иттифоқдошлари билан мунтазам маслаҳатлашиб туради», — деди у. Шунингдек, у Россияга нисбатан ҳозирча «қўшимча санкциялар йўқ»лигини маълум қилди.
МРБ вакили Тод Эбицнинг таъкидлашича, АҚШ ҳукуматининг бошқа вакиллари каби Бреннан ҳам Москва ва Киев ўртасидаги келишмовчиликни ҳал қилишнинг ягона йўли дипломатик усуллар эканига ишончи комил.
Олий рада томонидан тайинланган Украина президенти вазифасини бажарувчи Александр Турчинов 2014 йил 14 апрель куни ўз мамлакати фуқароларига — федерализация тарафдорларига нисбатан куч ишлатиш ҳақида буйруқ берди. Киевнинг янги ҳукумати четдан ҳарбий кўмакка умид қилмоқда.
Бу орада Олий рада томонидан Украина Хавфсизлик хизмати раҳбари этиб тайинланган Валентин Наливайченко МРБ томонидан ёллангани маълум бўлди. Бу ҳақда УХХ собиқ раҳбари Александр Якименко баёнот берди.
Маълум бўлишича, Наливайченко Вашингтондаги Украина элчихонасида бош консул бўлиб ишлаётганидаёқ МРБ томонидан жалб этилган. Элчиликдан кетганидан кейин ҳам улар билан алоқада бўлиб турган.
Айни пайтда Киевдаги УХХ биносининг бир қавати Америка махсус хизматига берилган.
Изоҳ (0)