Ўзбекистон Республикаси Олий Мажлиси Қонунчилик палатаси «Парламентаризм билимдони—2014» анъанавий танлови давом этаётганини маълум қилди. Танлов палата расмий сайтида ёшлар ўртасида ўтказилмоқда, дейилади танлов эълонида.
Танлов ёшларнинг ҳуқуқий ва сиёсий маданиятини ошириш, улар орасида конституция ғояларини ҳамда ушбу ғоялар асосида қабул қилинган қонунларнинг мазмун-моҳиятини тарғиб қилишга кўмаклашиш, миллий парламентнинг фаолияти тўғрисида тўлиқ ва ишончли ахборот олишни таъминлаш мақсадида ўтказилади.
Танлов қуйидаги талаблар асосида ўтказилади:
- Танлов иштирокчилари – 14 ёшдан 30 ёшгача бўлган ёшлар;
- Танловда иштирок этишни хоҳловчилар танлов иштирокчиси сўровномасини тўлдириши лозим. Унда ўзи ҳақидаги маълумотлар (исми-шарифи, туғилган йили, иш ёки ўқиш жойи, яшаш манзили, телефон рақами) кўрсатилади. Танлов иштирокчисининг сўровномаси Қонунчилик палатаси сайтида жойлаштирилади;
- Танловга бериладиган саволлар Қонунчилик палатасининг расмий сайтида ҳар ҳафтанинг сешанба куни жойлаштирилади (март ойидан декабргача). Танлов иштирокчиларининг жавоблари савол эълон қилинган ҳафтанинг якшанба кунигача қабул қилинади. Ушбу муддат давомида танловнинг ҳар бир қатнашчиси саволларга фақат бир марта жавоб бериши мумкин. Шунингдек, иштирок этишни хоҳловчилар танловнинг исталган туридан бошлаб қатнашиш ҳуқуқига эга;
- Танлов саволларининг йўналишлари:
- Ўзбекистон Республикаси Конституцияси ва қонунлари;
- Олий Мажлис Қонунчилик палатаси фаолияти;
- Депутатлик бирлашмалари фаолияти (сиёсий партиялар фракциялари, депутатлик гуруҳлари сони, уларнинг таркиби ва ваколатлари);
- Танловни баҳолаш мезонлари – ҳар ҳафта (танлов тугагунга қадар) сешанба куни мазкур учта йўналиш бўйича учта савол тўртта жавоб варианти билан эълон қилинади. Ҳар бир тўғри жавоб бир баллдан баҳоланади. Барча савол ва жавобларнинг вариантлари ўзбек ва рус тилларида жойлаштирилади. Қонунчилик палатасининг сайтида ҳар душанба куни танлов қатнашчиларининг рейтинг жадвали эълон қилинади, унда қатнашчиларнинг исми-шарифи ва умумий баллари кўрсатилади;
Танлов 2014 йил 4 мартда бошланган бўлиб, 2014 йил 1-декабргача давом этади. Онлайн танловнинг ўзига хос жиҳати шундаки, унда саволлар ва жавоблар электрон базага киритилган бўлиб, натижалар автоматик тарзда ҳисоблаб чиқилади ва ғолиблар аниқланади.
Изоҳ (0)