Апрель ойининг охирида Тошкентда барча турдаги шаҳар жамоат транспортларида (метро, автобус, трамвай ва йўналишли такси) йўловчилар оқими ўрганиб чиқилади. Бу тўғрида «Тошшаҳартрансхизмат» компанияси берган маълумотга таяниб Gazeta.uz хабар қилмоқда.
Текширув Тошкент шаҳар ҳокимияти, Ўзбекистон автомобиль ва дарё транспорти агентлиги, «Тошшаҳартрансхизмат» ҳамда Тошкент шаҳар ҳокимлиги Йўловчи транспортининг барча турлари ҳаракатини лицензиялаш ва мувофиқлаштириш департаменти томонидан, Тошкент автомобиль-йўллар институти ва Тошкентдаги Турин политехника университети ҳамкорлигида ўтказилади.
Тадбир 23 апрель (чоршанба) ва 27 апрель (якшанба) кунларига режалаштирилган. Унга 11 мингга яқин талаба ҳамда пойтахт олий ўқув юртларининг 150 нафар ишчилари жалб этилади. Тадбирда барча турдаги транспорт воситаларининг ҳар бир эшигига ҳисобловчи талаба бириктириб қўйилади. Улар транспортга чиқаётган ҳар бир йўловчига бекат рақами белгиланган махсус талон беришади. Йўловчилар тушаётиб, уларни ҳисобловчиларга қолдириб кетишади, унга ўша бекат рақами белгилаб қўйилади.
Талабалар тўплаган карточкалар рейс тугаганидан кейин охирги бекатда йиғиб олинади ва тегишли маълумотлар билан бирга махсус қопларга жойланади. Олинган маълумотларга Тошкентдаги Турин политехника университети ходимлари томонидан ишлов берилади.
Жамоат транспортида йўловчилар оқимини бундай ўрганиш ҳар бир йўналишда қанча транспорт воситаларига зарурат мавжудлигини аниқлаш ва шу асосда мавжуд имкониятларни тўғри тақсимлаб, аҳолига сифатли транспорт хизмати кўрсатишга хизмат қилади. Шу сабабли текширув ташкилотчилари йўловчилардан тадбирда фаол иштирок этишларини сўрашади.
Изоҳ (0)