2014 йил 15 апрель куни соат 11:00 да Алишер Навоий номидаги кино саройида «Ўзбеккино» Миллий агентлиги буюртмасига биноан «Ўзбекфильм» киностудиясида суратга олинган «Зарб» бадиий фильмининг оммавий ахборот воситалари учун премьераолди намойиши ва картина ижодкорлари иштирокида матбуот анжумани бўлиб ўтади.
Элмира Ҳасанова сценарийси асосида яратилган фильмга маҳоратли киноижодкор Нозим Тўлахўжаев режиссёрлик қилган. Постановкачи оператор Жасур Шаметов, постановкачи рассом Бобур Исмоиловдир. Фильм мусиқасини бастакор Дмитрий Янов-Яновский басталаган.
Киноасарда истеъдодли созанда – доирачининг ҳаёти ҳикоя қилинади. У умрининг охирида севган аёли, дўстлари ва ҳамкасбларининг хиёнатига оид аччиқ ҳақиқатдан хабар топади. Дунёдан кўнгли совиб кетган пайтида истеъдодли, аммо ногирон шогирдига бўлган меҳри уни ҳаётга қайтаради.
Ролларни Бахтиёр Қосимов, Райҳон Уласенова, Юлдуз Ражабова, Фарҳод Абдуллаев, Сурат Исломов, Миртоҳир Миралиев, Шуҳрат Нуралиев, Ражаб Адашев, Азиза Бегматова, Муҳаммадали Иброҳимов сингари истеъдодли санъаткорлар ижро этган.
Изоҳ (0)