Чирчиқ олимпия захиралари коллежида дзюдо бўйича 1994—1995 йилларда туғилган ёшлар ўртасида Ўзбекистон чемпионати бўлиб ўтди, деб хабар бермоқда ЎзА.
Мусобақа Ўзбекистон Маданият ва спорт ишлари вазирлиги, шарқ яккакурашлари ва жанг санъатларини ривожлантириш маркази ва дзюдо федерацияси ҳамкорлигида ташкил этилди.
Умумжамоа ҳисобида хоразмлик дзюдочилар биринчи, Тошкент вилояти вакиллари иккинчи ва самарқандлик полвонлар учинчи ўринни эгаллади.
Қизғин ва муросасиз беллашувларда навоийлик Ғофур Актамов, самарқандлик Достон Ҳолиқулов, қашқадарёлик Маъруф Хидиров, Тошкент вилоятидан Раҳимжон Субҳонов, Достон Мейлиев, Муҳриддин Мирзаёров, сурхондарёлик Ромиш Раҳматов ва пойтахтлик Азамат Баҳодирзода ўз вазн тоифасида барча рақибларидан устун келиб, Ўзбекистон чемпиони унвонини қўлга киритди. Мутлақ вазнда хоразмлик Умарбек Рўзмаматовга тенг келадигани топилмади.
Қизлар ўртасидаги мусобақаларда андижонлик Матлуба Абдумуталова, хоразмлик Дилноза Султонова, Зарифа Султонова, Турсунпошша Нурматова, Кумуш Йўлдошева, қорақалпоғистонлик Омонгул Алланазарова, самарқандлик Иқбол Акрамова ва пойтахтлик Дилёра Бердиева шоҳсупанинг энг юқори поғонасига кўтарилди. Мутлақ вазнда хоразмлик Турсунпошша Нурматова ғалаба қозонди.
Изоҳ (0)