Бухорода умумтаълим мактаблари ўқувчилари ўртасида ўтказилаётган «Инглиз тили билимдони» республика интеллектуал мусобақасининг вилоят босқичи бўлиб ўтди. Бу ҳақда ЎзА маълум қилди.
Мусобақада жамоалар ўқиш ва ёзиш, оғзаки нутқни ривожлантиришга қаратилган шартлар бўйича ўз билимини синовдан ўтказди. Шунингдек, берилган мавзу бўйича тайёрланган саҳна кўринишлари орқали инглиз тилида сўзлашиш малакаси ва актёрлик маҳоратини намойиш этди.
Айни пайтда вилоятдаги умумтаълим мактабларида инглиз, француз, немис ва испан тиллари ўқитилмоқда. 533 таълим муассасасида қарийб 124 минг нафар ўқувчи инглиз тилини ўрганмоқда.
Бухоро шаҳри жамоаси биринчи ўринни эгаллади. Иккинчи ва учинчи ўринларни Ғиждувон ва Бухоро туманлари жамоалари қўлга киритди.
– Мактабимизда чет тилини чуқур ўрганиш учун барча шароитлар мавжуд, – дейди Бухоро шаҳри жамоаси вакили, 38-умумтаълим мактаби 9-синф ўқувчиси Мироншоҳ Восиев. – Лингафон ва компьютер хоналари биз, ўқувчилар ихтиёрида. Инглиз тилининг назарий асосларини ўрганиш баробарида эркин мулоқот қилиш кўникмасини мустаҳкамлашга ҳам алоҳида эътибор қаратилмоқда. Мусобақанинг мамлакат босқичида ҳам муваффақиятли иштирок этиб, биринчи ўринни эгаллашга аҳд қилганмиз.
Изоҳ (0)