Facebook ижтимоий тармоғи iOS ва Android платформалари учун мўлжалланган дастуридан хабар алмашиш имкониятини олиб ташлашни режалаштирмоқда. У мобил чат функсиясини алоҳида дастур – Facebook Messenger’га буткул кўчириб ўтказмоқчи, дея хабар қилади TechCrunch техноблоги.
Шу пайтгача ижтимоий тармоқнинг мобил дастурлари шахсий хабарлар алмашиш имконини берувчи функсияга эга эди. Бундан бир неча ой аввал смартфонига алоҳида Messenger дастури ўрнатилган фойдаланувчилар учун Facebook бу имкониятни мессенжерга йўлловчи ҳаволага алмаштирган. Агар фойдаланувчи Facebook ичида хабар алмашмоқчи бўлса, унда Messenger’ни юкламаслиги ёки ўчириб ташлаши керак эди.
Энди эса Facebook фойдаланувчиларида бундай имконият бўлмайди, деб ёзади TechCrunch. Ижтимоий тармоқнинг мобил дастуридан шахсий хабар алмашиш имкони буткул олиб ташланади, фойдаланувчилар эса Messenger’ни юклаб олишни таклиф этувчи билдиришнома чиқиб туради. Ҳозирда айрим Европа мамлакатларидаги фойдаланувчиларга билдиришномалар жўнатилмоқда. Вақт ўтиши билан Facebook мобил дастури фойдаланувчиларининг барчаси янги форматга ўтказилади.
Бу янгиликни кўпчилик илиқ қарши олмаслигини ҳозирданоқ тахмин қилиш мумкин, дейилади хабарда. Кишилар Facebook’дан кўпинча мулоқот учун ягона платформа сифатида фойдаланишади. Унда кўпчиликка кўринадиган тарзда бировнинг «девор»ига ёзиш ҳам, суҳбатдошларнинг ўзларигагина кўринадиган қилиб шахсий хабарда ёзишмалар олиб бориш ҳам мумкин. Фойдаланувчиларни алоҳида дастурдан фойдаланишга мажбур этишга уриниш уларни Facebook’дан совутиши мумкин. Чунки ҳозир шундоқ ҳам мессенжерлар бозори қизғин, энди яна бир мессенжерни ўрнатиб олиш кишиларга ортиқчадек туйилиши табиий.
Яна бир томондан, агар Facebook шахсий хабарларни Messenger дастурига ўтказадиган бўлса, унда WhatsApp сервисини 19 миллиард долларга сотиб олиш нимага керак эди, деган савол ҳам туғилади.
Мобил сервислар ҳозирда Facebook’нинг бош устунликларидан ҳисобланади – ижтимоий тармоқ дастурлари аудиторияси ойига бир миллиарддан ошади. Мобил рекламага эса 2013 йилги даромаднинг 40 фоизи сарф этилган. Компания раҳбари Марк Цукербергнинг маълум қилишича, ижтимоий тармоқ мустақил дастурлар – Facebook Messenger, Instagram, Poke, Paper дастурлари ва Facebook Home дастурий қобиғини ривожлантиришга йўналтирилган.
Изоҳ (0)