Апрель ойида бўлиши кутилаётган совуқлар сабаб Ўзбекистон мева ҳосилининг 35 фоизидан маҳрум бўлиши мумкин. Бу ҳақда Ўзбекистон қишлоқ ва сув хўжалигидаги манбага асосланиб, «РИА Новости» ахборот агентлиги хабар берди.
«13—15 апрель кунлари ҳаво ҳарорати пасайиши кутилмоқда, ўтган ҳафта эса мевали дарахтларнинг гуллари ғунча очган эди. Бу якуний ҳосилга сезиларли салбий таъсир кўрсатиши мумкин», – дейди агентлик манбаси.
Манбанинг сўзларига кўра, энг яхши ҳолатда Ўзбекистон кутилган ҳосил ҳажмининг камида 20 фоизидан маҳрум бўлади.
10—12 апрель кунлари Ўзбекистон бўйлаб ёмғир ёғиши, 12 апрель куни кечга томон алоҳида ҳудудларда қор ёғиши кутилмоқда. 13—15 апрель кунлари эса ҳаво ҳарорати -1 даражагача тушиб кетиши прогноз қилинган.
Қайд этиш жоиз, 8 апрель куни Тошкент шаҳри ва бошқа бир қатор ҳудудларда ҳаво ҳарорати кутилмаганда кескин пасайиб, қор ёғган эди.
«Кун»нинг маълумотига кўра, 2013 йил якунларига кўра Ўзбекистонда мева ва сабзавот етиштириш ҳажми 8,4 фоизга ошиб, 10,6 миллион тоннани ташкил этган эди.
Изоҳ (0)