Халқ депутатлари Тошкент шаҳар Кенгашининг ижтимоий-маданий ривожланиш масалалари бўйича доимий комиссияси «Истеъмолчиларнинг ҳуқуқларини ҳимоя қилиш тўғрисида»ги қонуннинг ижросини таъминлаш юзасидан бўлиб ўтган йиғилишда пойтахтда амалга оширилаётган ишлар тўғрисида мутасадди ташкилотларнинг ҳисоботлари эшитилди. Бу ҳақда Biznes-Daily хабар берди.
Давлат рақобат қўмитаси Тошкент шаҳар ҳудудий бошқармасига 2013 йили фуқаролардан жами 536 та ариза ва шикоят келиб тушган. «Ишонч телефони» орқали эса 391 та мурожаат бўлган. Улардан 603 таси коммунал хизмат, 129 таси савдо ва умумий овқатланиш, 90 таси хизмат кўрсатиш ҳамда 106 таси эса бошқа соҳаларга тегишли бўлган. Мурожаатларнинг аксарият қисми коммунал соҳага тааллуқли бўлганлиги боис, шикоятлар «Тошиссиққуввати» ва «Махсустранс» ишлаб чиқариш бирлашмалари, «Тошшаҳаргаз» филиали, Тошкент шаҳар электр тармоқлари ва «Сувсоз» давлат унитар корхоналари, Тошкент шаҳар хусусий уй-жой мулкдорлар ширкатлари уюшмаси мутахассислари билан биргаликда кўриб чиқилди. Уларни ўрганиш мобайнида 408 та ҳолат бўйича фуқароларнинг истеъмолчи сифатида бузилган ҳуқуқларини тиклашда амалий ёрдам кўрсатилди.
Мурожаатларни кўриб чиқиш натижасида истеъмол қилинмаган газ учун «Ташшаҳаргаз» филиали ва унинг туман бўлимлари томонидан асоссиз ҳисобланган 96 миллион сўмдан зиёд маблағ истеъмолчиларнинг фойдасига ҳал этилди. Қонун бузилиш ҳолатларига йўл қўйганлиги учун «Тошшаҳаргаз» филиалига нисбатан белгиланган тартибда иш қўзғатилиб, энг кам ойлик иш ҳақининг 200 баробари миқдорида, яъни 15 918 000 сўм миқдорида молиявий жарима қўлланилди.
Изоҳ (0)