Европа Кенгашининг Парламент ассамблеяси 9 апрель кунги йиғилишида Россиянинг Қримни қўшиб олганлигини қоралаб, уни яриморолдан тезда қўшинларини олиб чиқиб кетишга чақирди. Бу ҳақда Gazeta.ru хабар қилмоқда.
Нашрнинг ёзишича, Украина жануби-ғарбида, хусусан, Луганскда аҳвол янада жиддий тус олиши мумкин. Украина ички ишлар вазири Арсен Аваков эса бу ерда «айирмачилик муаммоси 48 соат давомида ҳал этилиши»ни маълум қилган.
«Ассамблея Россиянинг ҳарбий тажовузини ва Қримни босиб олганлигини қатъиян қоралайди. Бу БМТ Низоми, Европа Хавфсизлик ва Ҳамкорлик Ташкилотининг Хельсинки акти ҳамда Европа Кенгашининг Низоми ва асосий қоидалари талабларини яққол бузишдир», – дейилади Ассемблея томонидан тасдиқланган резолюцияда.
Украина томони эса резолюцияга Москвани ўз қўшинларини Қримдан олиб чиқиб кетишга чақирувчи тузатишни киритди. Ҳужжат кўпчилик овоз билан қабул қилинди: уни 140 нафар аъзо маъқуллади, 32 нафари қарши овоз берди, 9 нафари эса бетараф қолди.
«Қримда жойлашган Қора денгиз флоти бўйича 1997 йилда тузилган битимнинг Россия Федерацияси томонидан бекор қилинганлиги муносабати билан, Ассамблея Россияни зудлик билан Қримдан ўз қўшинларини олиб чиқишга чақиради», – дейилади тузатиш матнида.
Россиянинг расмий кишилари эса Европа Кенгашининг Парламент ассамблеяси резолюциялари аҳамият қаратишга арзимаслигини кейинги кунларда тобора кўпроқ таъкидлаётган эдилар, дейилади хабарда.
Изоҳ (0)