Россиялик жарроҳлар дунёда биринчи бўлиб ёрдамчи робот тизими – da Vinci асосида пластик жарроҳликни амалга оширишди. Бунгача ушбу мослама асосан кардиология, урология ва гинекологияда қўлланилар эди, деб ёзади Gazeta.ru.
Тўрт қўлли da Vinci қурилмаси узоқ давом этадиган операцияларни ҳам энг юқори даражада стерилланган шароитларда ўтказа олади. Бунда жарроҳ масофадан туриб, роботни жойстик ёрдамида бошқаради. Камера эса операция қилинаётган жой тасвирини бир неча марта катталаштирилган ҳолатда 3D-форматда кўрсатиб туради.
Россиянинг ўзида бугунги кунда бундай роботдан 20 таси қўлланилмоқда, дунё бўйлаб эса юзлаб жарроҳлик роботлари ёрдамидан фойдаланилади. Бироқ шу пайтгача пластик операция робот ёрдамида қилинмаган эди. Гап шундаки, da Vinci’га айнан жарроҳнинг қўл ҳаракатларини такрорлай оладиган махсус «қўл»лар ўрнатиш орқали ундан муайян йўналишдаги ишда фойдаланиш мумкин. Шу кунгача кардиологлар, гинекологлар ва урологлар учун шундай «қўл»лар яратилган эди, москвалик шифокорлар эса улардан пластик жарроҳликда қўллаш мумкин бўлган мажмуани йиғишди.
Юзни ёшартириш бўйича робот ёрдамида ўтказилган операция икки ярим соат давом этди. Мижозга эртаси куниёқ уйига рухсат берилди, дейилади хабарда.
Изоҳ (0)