Ўзбекистонда соч экиш бўйича илк операция ўтказилди

Республика дерматология ва венерология махсус илмий-амалий марказида илк марта чоксиз усулда соч экиш операцияси ўтказилди. Ушбу операция кенг кўламдаги тайёргарлик ишларининг маҳсули ҳисобланади. Марказда ана шундай йирик операцияларни ўтказишга имкон берувчи энг сўнгги асбоб-ускуналар билан жиҳозланган янги операция хонаси ташкил этилди. Мутахассислар бундай операцияларни ўтказиш тажрибасига эга жаҳоннинг машҳур тиббиёт муассасаларида амалиёт ўтаб келди. Бу ҳақда Uzbekistan Today хабар берди.

«Бизнинг бу борадаги илк ишимиз жуда муҳим қадам бўлди. Йилдан йилга андроген калликка дучор бўлаётган эркаклар сони ошиб бормоқда. Андроген калликнинг асосий сабаби гормонал баланс бузилиши саналади. Ҳозирда бизга ҳатто йигирма ёшдаги беморлар ҳам мурожаат қилишмоқда. Айтиш керакки, ёшларнинг эрта калликка дучор бўлаётганлиги уларнинг ҳаёти сифатининг пасайишига олиб келади. Шунинг учун ҳам марказимизда андроген соч тўкилишга қарши соч экиш бўйича эга операцияларни ўтказмоқдамиз»,—дейди Республика дерматология ва венерология махсус илмий-амалий маркази директори ўринбосари Илҳом Раҳимов.

Бундай операциялар жараёнида ҳар бир соч толаси алоҳида-алоҳида экилади. Битта соч толасини экиш жараёни 3 босқичдан иборат. Аввало, донор соч толаси ажратилади. Кейин экиш учун жой тайёрланади. Сўнгида эса экилган толанинг янги жойга мослаштириш жараёни олиб борилади.