Наманган вилоятида биометрик паспорт олиш бўйича аҳолига қулайлик яратиш мақсадида фуқароларни қабул қилиш вақти узайтирилди. Бўлинмага банк ходими жалб қилиниб, тўлов терминаллари ўрнатилди. Паспорт олиш учун белгиланган тўловларни шу ернинг ўзида амалга ошириш йўлга қўйилди. Бу ҳақда ЎзА хабар берди.
Вилоятнинг Наманган тумани ички ишлар бўлими паспорт бўлинмаси бошлиғи, капитан Соҳибжон Бобожоновнинг сўзларига кўра, ҳафтанинг ҳар якшанба куни муассаса директори ва синф раҳбарлари иштирокида коллеж ва мактаб ўқувчиларига биометрик паспорт берилмоқда.
Амалиётнинг сифат ва самарадорлигини таъминлаш мақсадида туман ИИБ паспорт бўлинмаси биноси қайта таъмирланиб, фуқароларга қулай шароитлар яратилди. Кенг, ёруғ хоналар замонавий тарзда жиҳозланди. Кутиш залида паспорт-виза тартибини бузишнинг оқибатлари ҳақидаги видеороликларни мунтазам равишда намойиш этиш йўлга қўйилган бўлиб, ушбу тадбир ўзига хос ҳуқуқий тарғибот вазифасини ўтамоқда.
Изоҳ (0)