Жастин Биберга продюсери 2 млн евролик Bugatti Veyron автомобилини совға қилди
Канадалик машҳур қўшиқчи Жастин Биберга Bugatti Veyron автомобилини совға қилишди. Қизил рангдаги гиперкарнинг суратлари 8 апрель, сешанба куни хонанданинг Instagram ижтимоий тармоғидаги шахсий саҳифасида пайдо бўлди. 2 миллион евродан зиёдга баҳоланаётган автомобилни Биберга мусиқачи ва продюсер Birdman совға қилган.
Бундай қимматбаҳо совға унга нима сабабдан ҳадя этилганига Бибернинг ўзи бирор бир изоҳ бермаган. Аммо аввалроқ Жастин Бибер Birdman раҳбарлигидаги YMCMB продюсерлик маркази билан ҳамкорлик қилаётганлигини эълон қилган эди.
Биберга туҳфа этилган автомобил — Grand Sport сериясидаги Veyron’нинг очиқ версияси дунёда атиги 150 нусхада яратилган.
Ушбу машина Бибернинг шахсий автомобиллари ичида бешинчи спорткар бўлди. Улардан биринчиси — Ferrari 430'ни Бибер 2010 йил 16 ёшида сотиб олган. Ўша йилнинг ўзида мусиқачи P.Diddy унга Lamborghini Gallardoni ҳадя этган эди. Бундан ташқари, Жастиннинг шахсий автопаркидан яна 2 та супермашина: Lamborghini Aventador ва Ferrari 458 Italia, шунингдек, Audi R8, Cadillac CTS, Range Rover Sport ва 2 та спорт мотоцикллари ўрин олган.
Эслатиб ўтамиз, Жастин Бибер American Music Awards маросимининг «Йил хонандаси», шунингдек,«Гремми» мукофотининг «Энг яхши янги ижрочи» ва «Энг яхши поп-вокал альбоми» йўналишларидаги совриндори ҳисобланади. Айтиш керакки, Бибер энг тартибсиз ҳайдовчи ҳам ҳисобланади: уни бир неча марта автомобилни бошқаришда тезликни оширгани учун қўлга олишган. Шу йилнинг январь ойида эса Бибер Майамида автомобилни ҳужжатсиз ва маст ҳолда бошқарганлиги учун қамоққа олинган эди.
