2013 йилда Ўзбекистон ва Россия ўртасидаги пул ўтказмалари ҳажми 7 млрд доллардан ошди

2013 йил якунларига кўра, Ўзбекистон ва Россия ўртасидаги пул ўтказмаларининг умумий ҳажми 18,27 фоизга ўсиб, 2012 йилдаги 6,084 миллиард доллардан 2013 йилда 7,196 миллиард долларга етди. Бу ҳақда UzDaily Россия Марказий банки маълумотларига асосланиб хабар берди.

2013 йилда Россиядан Ўзбекистонга 6,633 миллиард доллар пул ўтказилган. 2012 йилда бу кўрсаткич 5,668 миллиард долларни ташкил этган (+17,02%). Ўзбекистондан Россияга ўтказилган пул маблағлари эса 2012 йилдаги 416 миллион доллардан 2013 йилда 563 миллион долларгача ошди (+35,34%). Ҳисобот даврида битта операциянинг ўртача суммаси 1742 доллардан 1901 долларгача ўсди.

Россия Марказий банкининг таъкидлашича, ушбу маълумотлар Anelik, BLIZKO, Coinstar Money Transfer, Contact, InterExpress, Migom, MoneyGram, PrivatMoney, UNIStream, Western Union, «АзияЭкспресс», «АЛЛЮР», «Блиц», «Быстрая Почта», «Золотая Корона», «Лидер» ва «Почта России» тизимларини қамраб олади.