«Газпром» компанияси газ нархини оширганлиги сабабли Украина Россиядан газ олишни тўхтатди. Бу ҳақда Украина энергетика вазири Юрий Продан маълумот берди, дея хабар қилади «ИТАР-ТАСС».
Проданнинг сўзларига кўра, Украина жорий йилнинг биринчи чорагида ўрнатилган эски нархни қайтариш борасида музокаралар олиб бормоқчи. Шу билан бирга, вазир март ойидаги газ учун Киев ҳозирча ҳисоб-китоб қилмаганлигини тасдиқлади. Унинг қўшимча қилишича, ўтган ойда газ етказиб бериш бўйича мамлакатнинг қарзи 550 миллион доллардан ошган.
Шунингдек, энергетика вазирининг хабар қилишича, Евроиттифоқ Словакиядан газ олиш масаласида Украинани қўллаб-қувватлашга ваъда берган. Европадаги газ компаниялари бу борада техник жиҳатдан қийинчилик йўқлигини, фақат ҳуқуқий жиҳатдан қийинчилик юзага келиши мумкинлигини тасдиқлашган. Бундан ташқари, Европа Иттифоқи Киевга энергетик ёрдам пакетини тақдим этишга ҳам ваъда бермоқда.
Изоҳ (0)