Android тизимли қурилмалар учун ишлаб чиқарилган, рейтингларда биринчи ўринга чиқиб олган Virus Shield пулли дастури бефойда эканлиги аниқланди. Бу тўғрида Android Police хабарига таяниб TJournal нашри маълумот бермоқда.
Google Play дастурлар дўконига Virus Shield жорий йилнинг март ойи охирларида қўйилган бўлса-да, охирги ҳафтада уни 10 мингдан зиёд фойдаланувчилар сотиб олишган. Google бу борада аниқ рақамни кўрсатмасдан, дастурни ўрнатишлар сони 10–50 минг орасида эканлигини кўрсатади. Шу тариқа, антивирус Google Play’нинг «янги пулли дастурлар» тоифасидаги барча вақтлардаги дастурлар рейтингида учинчи ўринга чиқиб олди.
3,99 доллар турадиган Virus Shield тавсифида кўрсатилишича, у смартфонга зарар келтирувчи дастурлар ўрнатилишининг олдини олади, реал вақт режимида файлларни ва созламаларни текширади, шунингдек, «шахсий маълумотни ҳимоялайди». Антивируснинг рейтинги беш балли тизимда 4,7 балл олиб, юқори кўрсаткични намоён этган.
Android Police таъкидлашича, аслида дастур юқорида кўрсатилган вазифаларнинг биронтасини ҳам бажармайди. «Антивирус»нинг коди очиб текшириб кўрилганида аниқланишича, дастур биттагина иш бажарган: экрандаги «текширилмаган» белгисини «текширилган» белгисига алмаштириб қўйган.
Android Police хулосасини дастурнинг таркибини ўрганиб чиққан бошқа мутахассислар ҳам тасдиқлашган.
Android Police қалбаки антивируснинг ишлаб чиқарувчиси – Deviant Solutions ҳақида маълумот топа олмади. Маълум бўлган ягона ҳолат – фирибгарлик қилишга уринганлиги учун уни Sythe.org форумида блоклаб қўйишган.
Virus Shield ҳақида Android Police шу маълумотларни чиқарганидан бир неча соат ўтиб, бу «пуч» дастур Google Play дўконидан ўчириб ташланган. Аммо унинг саҳифаси Google кешида сақланиб қолган.
Изоҳ (0)