Қозоғистоннинг Актобе шаҳрида яшовчи аёл тунлари диванни ғичирлатгани учун қўшнисини судга берди. Бу хусусда «Актобе Таймс» нашри хабар беради.
Тиббиёт институтида ўқитувчилик қилган, ҳозирда нафақада бўлган 75 ёшли Роза Чанишева қўшни квартиранинг эгаси ва уни ижарага олган кишиларни судга берди. У жавобгарлардан бир миллион тенге (5,5 минг доллар) миқдорида товон пули олишни кўзлаган эди, лекин суд Чанишеванинг даъвосини қисман қондириб, жавобгарлардан 50 минг тенге (275 долларга яқин) миқдорида пул ундириш ҳақида қарор чиқарди.
«Караван» газетасининг ёзишича, Чанишева судда шундай кўрсатма берган: эгаси квартирани кейинги беш йил давомида бошқа бир қўшнисига ижарага берган, у эса гўёки бу ерда ишратхона ташкил этган. Аёлнинг айтишича, у бир неча марта тунлари тепа қаватдаги диваннинг ғичирлашидан ухлай олмасдан, қўшниларининг уйига чиққан. Ҳар сафар эшикни турли эркаклар очган ва у ерда аёллар ҳам бўлган.
Квартирани ижарага олган киши эса бу даъвони рад этиб, у ерга ювиниш учун болалари ва неваралари борганлигини айтган. Кейин эса бу кўрсатмасини ўзгартириб, ўз уйига ўғли ва келини жойлашиб олганлиги сабабли ижара квартирага ўзи хотини билан бирга борганлигини баён этган. Квартира эгаси бўлса, ўз навбатида, қўшниларининг шикоятларидан бехабар эканлигини таъкидлаган.
Суд жараёни якунланганидан кейин даъвогарнинг вакили Луиза Гафарова айтишича, Қозоғистонда шу пайтгача бундай иш бўйича қўзғалган даъволар қондирилмаган.
Қозоғистон Маъмурий ҳуқуқбузарликлар тўғрисидаги кодексининг 333-моддасига кўра, тунги пайтда тинчликни бузганлик учун огоҳлантириш ёки жарима тарзида жазо берилади.
Изоҳ (0)