Расмий Москва Украинадаги инқирозни бартараф этиш учун кўп томонлама музокаралар олиб боришга тайёр, фақат шу шарт биланки, уларда мамлакатнинг жанубий ва шарқий ҳудудлари вакиллари ҳам иштирок этишлари лозим. Бундан ташқари, биргаликдаги маслаҳатлар бошланиши учун Украина ўзининг янги конституцияси лойиҳасини тақдим этиши керак. Бу ҳақда «Интерфакс» ахборот агентлиги хабар беради.
Россия ташқи ишлар вазири Сергей Лавров 8 апрель куни Ангола ташқи ишлар вазири Жоржи Ребелу Шикоти билан бўлган музокаралар якуни бўйича уюштирилган матбуот анжуманида шуни таъкидлади. «Дарҳақиқат, биз кўп томонлама учрашувни назарда тутмоқдамиз, унда европаликлар, АҚШ, Россия ва Украина томонлари иштирок этсин», — деди у.
Америка томони бундай учрашув 10 кун мобайнида ташкил этилиши мумкинлигини маълум қилган бўлса-да, Лавров ҳозирча бу борада аниқ бир сана ҳақида сўз юритилмаганлигини айтди.
Лавров Украина иши бўйича кўп томонлама музокаралар олиб борилиши учун Россиянинг икки шарти мавжудлигини айтди. Биринчидан, Москва бўлажак учрашувларда Украинанинг жанубий ва шарқий қисмлари вакиллари иштирок этиши лозим. Ташқи ишлар вазирининг фикрича, бу вакиллар ҳудудларнинг тайинланган губернаторлари эмас, балки Украинадаги президент сайловига ўз номзодини қўйган кишилар бўлиши даркор. Уларнинг ҳам барчаси эмас, балки етакчи сиёсатчи бўлганлари вакиллик қилиши мумкин, деб ҳисоблайди Сергей Лавров.
Россия ташқи ишлар вазири кўп томонлама музокаралар ўтказилишининг иккинчи шарти сифатида бунга қадар Украина янги конституцияси лойиҳаси тайёр бўлиши лозимлигини айтди. «Конституция лойиҳаси тайёр бўлса-ю, уни ҳеч кимга кўрсатмасдан туриб, Европа, АҚШ, Россия вакиллари билан музокараларда тасдиқлатиб олиш нияти йўқмикан?» — деган гумонни билдирди у.
Украина Ташқи ишлар вазирлиги эса, ўз навбатида, халқаро мулоқотга тайёр эканликларини маълум қилиб, бунинг учун Россия мамлакатнинг ички ишларига аралашишни тўхтатишини талаб этмоқда.
Изоҳ (0)