Сотҳебйъс аукционининг Гонконгда бўлиб ўтган савдолари чоғида Мин сулоласи даврига оид чинни «товуқ-пиёла» 281,2 миллион Гонконг доллари (36,3 миллион АҚШ доллари)га сотилди. Бу ҳақда The Wall Street Journal хабар бермоқда.
«Кун» нашрининг хабар беришича, 8 апрель, сешанба куни бўлиб ўтган аукциондаги бу савдо объекти тарихда энг юқори нархга сотилган Хитой чиннисига айланган.
Бу борадаги аввалги рекорд ҳам Гонконгдаги аукционда ўрнатилган бўлиб, 2010 йили атиргулли чинни хитой вазаси 252,7 миллион Гонконг долларига сотилган эди.
Пиёлани шанхайлик коллексионер Лиу Йичиан сотиб олган. «Мен нега бу пиёлани бундай катта нархга сотиб олдим? Чунки бу пиёла менга ёқади», — дейди Лиу.
Қайд этиш жоиз, ушбу пиёла 1999 йили Гонконг аукциони орқали 29 миллион Гонконг долларига сотилган бўлиб, бу ўша вақтлар учун энг рекорд нархга айланган эди.
Пиёлани 1999 йили сотиб олган Жузеппе Ашкеназининг ўзи сешанба кунги аукционларда «товуқ-пиёла» 200 миллион Гонконг доллари атрофида сотилишига умид қилганини билдирди.
Ченгҳуа даврига оид чиннилар ўзининг фавқулодда нафис ишлангани билан ажралиб туради. Рекорд нархга сотилган пиёла унга товуқ ва хўрозларнинг суратлари туширилгани учун «товуқ-пиёла» деб аталади.
Ҳозирги вақтда шундай пиёлаларнинг жаҳон бўйлаб фақат 19 таси сақланиб қолгани маълум бўлиб, уларнинг 15 таси музейлардан жой олган.
Изоҳ (0)