Самарқанд шаҳрида гандбол бўйича қизлар жамоалари ўртасида «Баркамол авлод—2014» спорт мусобақаларининг саралаш беллашувлари бўлиб ўтди. Бу ҳақда ЎзА хабар бермоқда.
Саралаш мусобақаларида Қорақалпоғистон Республикаси, Тошкент шаҳри ва барча вилоятлар ўрта махсус, касб-ҳунар таълими муассасалари ўқувчиларидан иборат жамоалар иштирок этди.
Бир неча кун давом этган қизиқарли ва муросасиз баҳсларда Андижон, Наманган, Қашқадарё ва Самарқанд вилоятлари гандболчилари юқори натижаларни қайд этиб, «Баркамол авлод—2014» спорт ўйинларининг финал босқичига йўлланмани қўлга киритди.
– Мактабда ўқиб юрганимизда «Умид ниҳоллари» саралаш босқичида мағлубиятга учраб, финалда қатнаша олмаганимиздан армонда эдик, – дейди Самарқанд вилояти жамоаси аъзоси, Булунғур маиший хизмат касб-ҳунар коллежи ўқувчиси Гулноза Хушмуродова. – Орадан икки йил ўтиб, энди коллеж ўқувчиси сифатида «Баркамол авлод» мусобақалари саралаш баҳсларида қатнашдик. Бу гал мусобақаларга ҳар томонлама пухта тайёргарлик кўрганимиз ва тажриба орттирганимиз ўз самарасини берди. Энди финал беллашувларида ҳам юқори натижалар учун курашамиз.
Изоҳ (0)