Туркманистоннинг 2014 йилги энг яхши туманига давлат раҳбари бир миллион доллар миқдорида мукофот тақдим этади. Бу хусусда маҳаллий оммавий ахборот воситаларига таяниб «Новый век» нашри хабар тарқатган.
Жорий йилнинг 4 апрель куни бўлиб ўтган кенгайтирилган ҳукумат йиғилишида президент Гурбангули Бердимуҳамедов шундай танлов эълон қилди. Бу тўғридаги қарорни имзолаб, давлат раҳбари энг яхши ижтимоий-иқтисодий ва маданий кўрсаткичларни намоён этган туман танлов ғолиби бўлишини таъкидлади.
Президентнинг сўзларига кўра, миллион доллар мукофот олишни истаган туман албатта давлатга пахта ва ғалла топшириш бўйича ўз мажбуриятларини бажариши, жиноятчилик ва гиёҳвандликка қарши самарали кураш олиб бориши, аҳолини соғлом турмуш тарзи кечиришга ундаши лозим.
Танлов ғолибини аниқлаш учун тузиладиган комиссия таркибига Туркманистоннинг вазирликлари, муассасалари ва жамоат ташкилотларидан вакиллар киритилади.
Хабарда таъкидланишича, энг яхши туман танлови бу йил иккинчи марта ўтказилмоқда. Ўтган йили мамлакат пойтахти яқинидаги Оқ Буғдой тумани шу номга ва мукофотга сазовор бўлган. Кенгайтирилган ҳукумат йиғилишида президент Гурбангули Бердимуҳамедов маълум қилишича, ўтган йилги ғолиб мукофот пулига туманда болалар ўйин мажмуаси барпо этишга қарор қилган.
Изоҳ (0)