Telegram’ни яратгани учун Дуровга қарши UCP жамғармаси даъво қўзғатди
«ВКонтакте» ижтимоий тармоғи акцияларининг 48 фоизига эгалик қилувчи UCP жамғармаси Виргиния оролларидаги судга даъво аризаси топширди. У ижтимоий тармоқ бош директори Павел Дуров ва «ВКонтакте» акцияларининг 52 фоизи соҳиби – Mail.ru Group устидан даъво қилган, деб ёзади «ИТАР-ТАСС».
Маълум бўлишича, даъво предмети Telegram интернет-мессенжеридир. «ВКонтакте»нинг бош директори бўлгани ҳолда Дуров уни 2013 йилнинг ёзида шахсий лойиҳа сифатида ишга туширган. Павелнинг акаси Николай Дуров ҳам, расман «ВКонтакте» техник директори бўлатуриб, Telegram’ни ишлаб чиқишда иштирок этган, дейилади UCP хабарида.
Жамғарманинг фикрича, Дуров ўз хизмат ваколатларидан фойдаланган ҳолда Telegram’ни яратган, аммо уни «ВКонтакте» доирасида ишга тушириш ўрнига, ўзи эгалик қилган. UCP шу асосда Telegram’да ижтимоий тармоқнинг ҳуқуқи мавжудлиги тан олинишини талаб қилмоқда.
— «ВКонтакте»нинг акционерлари ва директорлар кенгаши аъзолари сифатида ўз компаниямизнинг ривожланишини ва иқтисодий манфаатларимизнинг ҳимояланишини кўзлаймиз. Биз бундан кейин ҳам Telegram бизнесининг ҳар қандай қисмига бўлган ҳуқуқимизни ҳимоя қилиш учун имкон қадар барча юридик чораларни кўрамиз. Telegram’дан улуш сотиб олмоқчи бўлган ҳар қандай учинчи томон келажакда «ВКонтакте» томонидан эътирозлар бўлиши эҳтимолини ҳисобга олиши лозим, – дейди UCP ҳамкори Юрий Качуро.
Таъкидлаш керакки, UCP жамғармаси «ВКонтакте» акцияларининг 48 фоизини ижтимоий тармоқнинг ҳамкорликдаги асосчилари – Вячеслав Мирилашвили ва Лев Левиевдан 2013 йилнинг апрелида сотиб олган. Шундан кейин орадан кўп вақт ўтмай, Telegram мессенжери сабабли Дуров ва UCP ўртасида зиддият келиб чиққан. Павел Дуровнинг шахсий лойиҳалар билан шуғулланиши, шунингдек, мессенжерни ривожлантириш учун «ВКонтакте» захираларидан фойдаланиши (жамғарманинг фикри шундай) UCP томонига ёқмаган.
