АҚШнинг Нью-Йорк штатида жойлашган БМТ бош қароргоҳида Ўзбекистон Республикасида қабул қилинган «Соғлом бола йили» Давлат дастури ҳақидаги маълумот Бош ассамблеянинг 68-сессияси расмий ҳужжати сифатида тарқатилди, деб хабар бермоқда «Жаҳон» АА.
UzReport’нинг маълум қилишича, ҳужжатда Президент Ислом Каримовнинг ташаббуси билан 2014 йилнинг Ўзбекистон Республикасида Соғлом бола йили деб номланганлиги ва шунга доир дастур қабул қилинганлиги келтирилган.
Қайд этиш жоизки, «Соғлом бола йили» Давлат дастури етти бўлим ва 125 та банддан иборат бўлиб, уларда болаларнинг туғилиши, тарбияланиши ва таълим олиши, шунингдек ижтимоий соҳани ривожлантириш учун ажратилувчи воситаларнинг самарадорлигини ошириш орқали оилада соғлом муҳитни, ундаги иқтисодий ва маънавий-ахлоқий асосларни мустаҳкамлаш билан боғлиқ барча масалалар акс этган.
Шунингдек, дастурда оилада ўзаро муҳаббат ва ҳурмат муҳитини, юксак ахлоқий қадриятларни шакллантириш, ёш оила оёққа туришида моддий ёрдам кўрсатиш, оналик ва болалик муҳофазасини таъминлаш, она ва бола саломатлигини мустаҳкамлаш, аёлларга ўзини намоён қилиши учун зарурий шароитларни яратиш ва кундалик уй меҳнатини енгиллаштириш каби бирламчи вазифалар аниқлаштирилган.
Таъкидлаш жоизки, «Соғлом бола йили» Давлат дастури ҳақидаги маълумот БМТнинг барча олтита расмий тили — инглиз, араб, испан, хитой, рус ва француз тилларига ўгирилган бўлиб, электрон кўринишда БМТ сайтига жойлаштирилган.
Изоҳ (0)