Қорақалпоғистон Республикасининг Элликқалъа туманида Жаҳон саломатлик куни муносабати билан оммавий югуриш мусобақаси ўтказилди, деб хабар бермоқда ЎзА.
Туман маданият ва спорт ишлари бўлими, хотин-қизлар қўмитаси, «Камолот» ёшлар ижтимоий ҳаракати туман кенгаши ҳамкорлигида ташкил этилган мусобақада умумтаълим мактаблари, академик лицей ва касб-ҳунар коллежлари ўқувчилари, маҳалла ёшлари, корхона ва ташкилотлардан 1 500 нафардан ортиқ иштирокчи уч километр масофага югуриш бўйича беллашди.
Мусобақада Сапарбой Араздурдиев, Жўрабек Аметов, Иномжон Юсупов, Олтинбек Нурбоев, Моҳим Йўлдошева, Лайло Шерипбоева, Шаҳло ва Шоҳсанам Илясова шоҳсупага кўтарилди. Шунингдек, «Энг ёш иштирокчи», «Энг кекса иштирокчи» ва «Энг яхши спортчилар оиласи» номинациялари бўйича ҳам ғолиблар аниқланиб, махсус диплом ҳамда қимматбаҳо совғалар билан тақдирланди.
– Айни пайтда туманимизда 13 минг нафарга яқин ёшлар спортнинг 12 тури билан мунтазам шуғулланмоқда, – дейди туман ҳокими ўринбосари Умар Собиров. – Тумандаги 42 спорт зали, 150 спорт майдончаси, ёпиқ сув ҳавзаси, 10 га яқин теннис корти ёшлар ихтиёрида. Спортчиларимиз орасида 50 га яқин Ўзбекистон чемпиони, 100 нафардан ортиқ Қорақалпоғистон биринчилиги ғолиби бор.
Мусобақа доирасида велопойга ҳам ўтказилди. Элликдан ортиқ спортчи иштирок этган пойгада Қудрат Ибодуллаев маррага биринчи етиб келди. Иккинчи ва учинчи ўрин Муҳриддин Хўжамбергенов ҳамда Сарвар Яхшимуратовга насиб этди.
Изоҳ (0)