Ўзбекистонда мобил телефон ишлаб чиқариш 3,9 марта ошади

Ўзбекистон электр техника саноати корхоналари 2019 йилгача маиший электр техникаси бўйича янги ишлаб чиқаришларни йўлга қўйиш учун 153,4 миллион доллар йўналтиради. Бу ҳақда UzDaily хабар берди.

Ўзбекистон Республикаси Президенти қарори билан 2014—2018 йилларда электр техника саноатини ривожлантириш дастури тасдиқланди. Унга кўра, ҳозирда амалда бўлган маиший техника ишлаб чиқаришни модернизация қилиш ва янгиларини йўлга қўйиш бўйича 24 та лойиҳа амалга оширилади.

Дастур доирасида Ўзбекистон беш йил ичида телевизор ишлаб чиқаришни 4,6 марта (635 минг донагача), мобил телефон чиқаришни 3,9 марта (1 миллион донагача), совитгич ва музлаткич ишлаб чиқаришни 2,5 марта (600 минг донагача) кўпайтиради.

Янги маиший техника ишлаб чиқариш Тошкентнинг «Алгоритм», «Фотон», «Мотор заводи», Самарқанднинг «Сино» корхоналари базасида, шунингдек, Навоий, Жиззах ва Ангрендаги эркин иқтисодий зоналарда йўлга қўйилиши назарда тутилган.

Дастур корхоналарнинг ўз маблағлари (77,8 млн доллар), ўзбек банклари кредитлари (36,2 млн доллар) ва хорижий инвестициялар (39,4 млн доллар) ҳисобидан молиялаштирилади.