Қрим воқеалари сабабли бир қатор россияликлар қатори, Россия Федерацияси президенти маъмурияти раҳбари Сергей Ивановга нисбатан ҳам санксия эълон қилинганидан хабарингиз бор. Яқинда шу сабабли айнан Сергей Иванов исм-фамилияли мутлақо бошқа бир россиялик интернет-дўкондан кроссовка харид қила олмади. Бу ҳақда «Россия 1» телеканали хабарига асосланиб «ИТАР-ТАСС» маълум қилмоқда.
Санкт-Петербургдаги «Метро» газетаси ходими бўлган Сергей Иванов кроссовка сотиб олиш учун АҚШдаги интернет-дўконга буюртма берган, аммо унга рад жавобини беришган. Дўконнинг жавоб хатига кўра, буюртмачининг исми, фамилияси ва отасининг исми АҚШ ҳудудидан почта жўнатмалари юборилиши тақиқланган шахслар рўйхатига киритилган. Маълум бўлишича, буюртмачини Россия президенти маъмурияти раҳбари билан адаштиришган. Вазиятдан чиқиб кетиш учун буюртма бошқа бировнинг исмига расмийлаштирилди ва сотиб олинди.
Бундан хабар топган президент маъмурияти раҳбари ўз адашига мактуб йўллади. Унда шундай дейилади:
Муҳтарам юртдошим ва адашим! АҚШ маъмурияти томонидан менга жорий этилган санксиялар сиз учун ноқулайликлар туғдирганлигини билиб ҳайратга тушдим. Сизга юбориладиган жўнатмани ушлаб қолишибди... Эҳтимол, бу каби ҳолатларга кейин ҳам дуч келармиз, ахир, мамлакатда ўн минглаб Сергей Ивановлар мавжуд. Аммо, ишонаманки, биз биргаликда бу каби кўнгилсизликларни бартараф этамиз. Бу ҳолат мисолида биз Американинг қўрқинчли санксияларини қандай «айланиб ўтиш» мумкинлигини кўрдик. Самимият билан, С. Иванов.
Изоҳ (0)