Канаданинг Блекфалдс шаҳарчасида содир бўлган жиноят антиқалиги билан ажралиб туради. 25 яшар, уй-жойсиз Жесси Сеска заргарлик дўконини талагач, қочиш учун турли транспорт воситаларини ҳам олиб қочган, аммо барибир қўлга тушган. Бу ҳақда мамлакатнинг марказий оммавий ахборот воситаларига таяниб «ИТАР-ТАСС» хабар бермоқда.
Заргарлик дўконидаги буюмлар билан бирга у ердан ўқотар қуролни ҳам олиб чиққан талончи воқеа жойидан яшириниш учун қорда юрадиган машинасини олиб қочган. Уни ҳайдаб кетаётиб, йўлда ботиб қолган ва машинани ташлаб, қалинлиги бир метр келадиган қорда пиёда юриб, яқин атрофдаги фермагача етиб олган. Жесси у ердан автомобил миниб қочган, лекин у ҳам ботиб қолган!
Сеска яна қорда юриб навбатдаги фермагача пиёда етиб олгач, фермернинг юк ортувчи тракторини миниб қочган. Кейинчалик уни қўлга олган полициячи Эдриан Дин шундай дейди: «Фермерлар бизга хабар қилишларича, кимдир уларнинг омборхонасига кириб, у ердаги тракторни ҳайдаб қочган. Бунгача биз бир неча соатдан буён Сескани излаётган эдик. Дарҳол ўша ерга етиб бордим ва фермернинг хотини билан бирга қорда юрувчи машина ёрдамида далалар ва қияликлар бўйлаб жиноятчининг изига тушдик».
Улар 45 дақиқа давомида саккиз километр йўл босиб, Жессини қувиб етишган. Жиноятчининг дала техникасидан фойдаланишдаги тажрибасизлиги уларга қўл келган. Гап шундаки, Сеска олиб қочган пайти тракторнинг юк ортувчи механизми кўтарилиб турган бўлган, уни қандай туширишни эса жиноятчи билмаган. Натижада йўлидаги ўнқир-чўнқирлардан бирида трактор мувозанатни йўқотиб, ағдарилиб қолган.
Омадсиз талончи шу тариқа қўлга тушган. Дўконни ўмаргани, учта транспорт воситасини олиб қочгани – ҳаммаси инобатга олиниб, унга тегишли айбловлар эълон қилинган.
Изоҳ (0)