5 апрель куни Хитойнинг жануби-ғарбидаги Юннан провинциясида 5,3 магнитудали зилзила юз берди. Табиий офатда 20 дан ошиқ киши жабр кўрди, уйлар шикастланганлиги сабабли 20 мингдан ошиқ аҳоли эвакуация қилинди, деб ёзади Vesti.ru.
Провинцияда 2700 га яқин бино шикастланган, шулардан 70 дан ортиғи буткул вайрон бўлган. Ўпирилишлар сабабли айрим йўллар ҳам қисман ишдан чиққан. Офат юз берган жойга қутқарувчилар ва инсонпарварлик ёрдамлари жалб этилган, эвакуация нуқталари ташкил этилган. Электр таъминотида юзага келган узилишлар бартараф этилган.
Зилзила ўчоғи Силуду аҳоли яшаш жойи яқинида, 13 километр чуқурликда бўлган. Ундан 15 километр узоқликда эса йириклиги жиҳатидан мамлакатда иккинчи ўринни эгалловчи гидроэлектр станцияси жойлашган. Ҳукуматдан хабар беришларича, ГЭС одатдагидек ишламоқда.
Изоҳ (0)