Тошкентда Ўзбекистон, Афғонистон, Туркманистон, Қозоғистон, Тожикистон, Қирғизистон шахмат федерациялари мутасадди раҳбарлари иштирокида минтақавий семинар бўлиб ўтди. Бу ҳақда «Туркистон пресс» хабар берди.
Семинарда қайд этилганидек, мамлакатимизда спортнинг бошқа кўплаб турлари қаторида юксак ақл-заковат, ўткир зеҳн ва кучли билим талаб этадиган шахмат ҳам тобора оммалашиб бормоқда. Ўзбекистонлик шахматчилар қитъа ва жаҳон чемпионатлари, жаҳон шахмат олимпиадаси, Осиё ўйинлари каби нуфузли мусобақаларда доимий равишда муваффақиятли иштирок этиб келмоқда.
Хусусан, 2013 йили 6 ёшдан 20 ёшгача бўлган шахматчилар жаҳон ва қитъа чемпионатларида жами бўлиб 17 та медалга сазовор бўлди. ФИДЕ президенти соврини учун уч йилдан буён ўтказиб келинаётган Марказий Осиё кубоги мусобақасида Ўзбекистон терма жамоаси аъзолари кетма-кет уч маротаба бош совринни қўлга киритди.
— Ўзбекистон — шахмат жадал ривожланаётган мамлакатлардан бири, — деди ФИДЕ президенти ассистенти Берик Балгабаев. — Юртингизда болалар спортини ривожлантиришга қаратилаётган эътибор самарасида ёш шахматчилар мусобақаларда улкан натижаларга эришмоқда. Бу Ўзбекистон шахматининг ёрқин келажагидан далолат беради.
Минтақавий семинарда Марказий Осиё ҳудудида шахматни янада оммалаштириш, Халқаро шахмат федерацияси — ФИДЕ Конгрессига тайёргарлик кўриш ва ушбу халқаро ташкилот билан алоқаларни янада мустаҳкамлаш, ўзаро ҳамкорликни ривожлантириш каби муҳим масалалар муҳокама қилинди.
Изоҳ (0)