Айни кунларда Сурхондарё вилоятида чигит экиш ишлари жадал суръатларда олиб борилмоқда. Бу йилги экиш ишларига қишлоқ хўжалиги ходимларидан иборат махсус гуруҳлар жалб этилди. Гуруҳлар зарур техникалар билан таъминланган бўлиб, экин майдонларига ёқилғи мойлаш материаллари ҳамда уруғлик чигит етказиб берилмоқда. Бу ҳақда «Туркистон пресс» хабар берди.
— Уруғлик чигитни туманимиздаги фермер хўжаликларига етказиб берамиз, — дейди Шеробод туманидаги Усмон Юсупов уруғлик чигит тарқатиш шохобчаси мудири Мурод Шодиев. — Бу борада шохобчамизда барча шароитлар яратилган. Тайёр уруғлик жойларга махсус техникалар ёрдамида етказиб берилмоқда.
Шеробод тумани Сурхондарё вилоятининг экин майдони катта ҳудудларидан бири ҳисобланиб, вилоятнинг қишлоқ хўжалиги ривожига муносиб улуш қўшади. Туман қишлоқ хўжалигида барча агротехник тадбирлар яхши йўлга қўйилганлиги боис пиллачилик, пахтачилик, ғаллачиликда юқори натижалар қўлга киритиб келинмоқда.
— Нуриддин Муродов фермерлар уюшмаси тумандаги илғор уюшмалардан биридир, — дейди фермерлар уюшмаси бошлиғи Суюн Ўтаганов. — Уюшмамизда 2 305 гектарда пахта ҳамда 2 073 гектарда ғалла парвариш этилади. 800 гектардан ошиқроқ майдонларда чигит экиш ишлари якунланди ва қолган майдонлар яқин кунларда ниҳоясига етказилади.
Фермерлар уюшмасига қарашли «Пайғамов Пўлат», «Тоштемир-Ўткир-Аббос», «Нормуродов Шавкат», «Абдуллаев Муродали Муҳаммедович» ва «Муҳиддин-Аслиддин-Бакир» каби бир қатор фермер хўжаликларида экиш ишлари биринчилардан бўлиб якунланди.
— Фермер хўжалигимиздаги мавжуд ғалла майдонлари 2 маротаба кимёвий озуқалар ва маҳаллий ўғитлар билан озиқлантирилди. Чигит экиш ишларини эса ниҳоясига етказдик, — дейди «Бобоқулов Раим» фермер хўжалиги бошлиғи Баҳодир Бобоқулов. — Чигит вақтида экилса мўл ҳосил гарови эканлигини яхши биламиз. Шунинг учун ҳам мавсумда барча бирдек масъулдир.