ЎзЛиДеП «Аёллар қаноти» Олий Мажлис қонунчилик палатасидаги ЎзЛиДеП фракцияси, Савдо-саноат палатаси ва қатор етакчи тижорат банклари билан ҳамкорликда «Оилавий тадбиркорликдан — мустаҳкам оилага», «Тадбиркорлик тамойиллари ва ишбилармонлилик имкониятлари», «Соғлом оила — мустаҳкам оила» партиявий лойиҳаларни амалга ошириб келмоқда. Бу ҳақда партия матбуот хизмати хабар берди.
— 2014 йилда ЎзЛиДеП ва Фермерлар Кенгаши ўртасида тузилган Бош битим доирасида «Фермерлик ҳаракати — ҳал қилувчи ижтимоий-сиёсий куч» янги лойиҳасини амалга оширишни режалаштирганмиз, — дейди партия Сиёсий Кенгаш Ижроия қўмитаси Аёлларнинг сиёсий фаоллиги, жамиятдаги ўрни ва мавқеини ошириш бўлими мудири Севара Муслимова. — Ушбу лойиҳада фермер хотин-қизларнинг ижтимоий-иқтисодий, сиёсий-ҳуқуқий билим ва кўникмаларини ошириш, жойларда янги иш ўринлари яратиш назарда тутилган. Умуман олганда лойиҳаларимизнинг амалий натижасида ишбилармон опа-сингилларимиз сафи кенгайиб боряпти.
2011 йилдан бошлаб амалга ошириб келинаётган «Оилавий тадбиркорликдан — мустаҳкам оилага» лойиҳаси асосида ташкил этилган ўқув машғулотларда 30 минг нафардан зиёд хотин-қизлар иштирок этди. Тижорат банклари томонидан 800 нафар хотин қизларга 6 миллиард сўмга яқин кредитлар ажратилиб, жойларда 1200 та янги иш ўринлари яратилди.
— Республикамизнинг энг чекка жойларида ҳам оилавий тадбиркорликни тарғиб этиш ва ривожлантириш масаласига катта эътибор қаратяпмиз, — дейди ЎзЛиДеП Сиёсий Кенгаши Ижроия қўмитаси раиси ўринбосари Мухлиса Акрамова. — Жумладан, опа-сингилларимиз ўз ҳуқуқларини тушунган ҳолда тадбикорлик фаолиятини юритишлари учун Ўзбекистон Республикаси «Оилавий тадбиркорлик тўғрисида»ги қонунининг мазмун-моҳияти кенг тарғиб қилинмоқда.
Эътиборга молик лойиҳалардан яна бири «Соғлом оила — мустаҳкам оила» бўлиб, 2011—2013 йиллар давомида ҳудудларда 650 та тадбирлар амалга оширилди. Уларда 27 минг нафарга яқин хотин-қизлар қатнашди ва 1500 нафар хотин-қизлар бепул тиббий кўрикдан ўтказилди. Ташкил этилган давра суҳбатларида аёллар саломатлиги, оилалар мустаҳкамлиги, қизларни эрта турмушга узатиш, қариндош-уруғлар ўртасидаги никоҳнинг салбий оқибатлари тўғрисида атрофлича фикр-мулоҳазалар юритилиб, тегишли тавсиялар берилди.
— Оилавий бизнес ва тадбиркорликнинг ҳуқуқий асосларини ўқитишга қаратилган «Тадбиркорлик тамойиллари ва ишбилармонлик имкониятлари» лойиҳа доирасида сўнгги уч йилда 1000 дан ортиқ тадбирлар ўтказилиб, уларда 25 минг нафарга яқин хотин-қизлар қатнашди. Жорий йилда ҳам мазкур лойиҳалар кўламини кенгайтириб, ижобий натижаларни қўлга киритишни режалаштирганмиз, — дейди М. Акромова.
Фарғонадаги «Дил Феруз» хусусий корхонаси раҳбари Дилафруз Умрзоқова бундан икки йил аввал тикувчилик цехи очиб, болалар кийими ва кўрпа-тўшак жилдлари ишлаб чиҳаришни йўлга қўйган эди. Ўтган муддат ичида тадбиркор 4 нафар хотин-қизни иш билан таъминлади. Маҳалладаги 2 нафар аёлни касаначиликка жалб этди. Дилафруз ўз фаолиятини кенгайтириш мақсадида мазкур лойиҳада иштирок этиб, қандолатчилик фаолиятини йўлга қўйди.
— Партия лойиҳалари доирасида ташкил этилган ўқув-семинарларда доимий иштирок этганимдан кейин менда тадбиркорлик билан шуғулланиш иштиёқи пайдо бўлди, — дейди Гулистон шаҳридаги «Разоқ ҳамкор Нурсултон» оилавий корхонаси раҳбари Гулнора Ўлмасова. — Молия муассасалари билан ёш тадбиркорлар орасида мустаҳкам ва ишончли «кўприк» вазифасини ўтаётган бу каби ўқув-семинарлар, молиявий томонидан чўчиб, тадбиркорликни бошлашга иккиланиб турган хотин-қизларимизга катта ёрдам беряпти.
ЎзЛиДеП «Аёллар қаноти» 2014 — «Соғлом бола йили»да ҳам тадбиркорлигини бошламоқчи ёки кенгайтирмоқчи бўлган барча хотин-қизларни лойиҳаларда фаол иштирок этишга чақириб қолади.