Шимолий Корея «янгича шаклдаги» ядро синовлари ўтказиши мумкинлигини маълум қилди

Агар расмий Вашингтон Шимолий Кореядаги ҳозирги тузумни ағдаришга ҳаракат қилишда давом этаверса, КХДРнинг янги ядро синовлари ўтказишдан бошқа иложи қолмайди. Ню-Ёркда бўлиб ўтган матбуот анжуманида КХДРнинг БМТдаги доимий вакили ўринбосари Ри Дон Ил шундай дея баёнот берди. Бу тўғрида Жанубий Кореянинг давлат телерадиокомпанияси – KBS’нинг 5 апрельдаги хабарига таяниб «ИТАР-ТАСС» маълумот бермоқда.

Баёнотда синовлар «янгича шаклда» ўтказилиши маълум қилинган, Ри Дон Ил АҚШ маъмуриятига бунинг айнан қандай шаклдаги синов бўлишини кўриш учун кутиб туришни маслаҳат берган.

Ри Дон Ил «Шимолий Кореяни сиёсий четлаштириш ва иқтисодий яккалашга қаратилган Америка сиёсати»ни танқид қилган. Мамлакатдаги коммунистик режим инсон ҳуқуқларини бузаётганлиги борасидаги айбловларга жавобан у КХДРда «дунёдаги энг яхши жамият тизими» қурилганлигини баён этган.

БМТ Хавфсизлик кенгаши резолюциялари Корея Халқ Демократик Республикасига ядро технологиялари билан боғлиқ ҳар қандай фаолият олиб боришни тақиқлаб қўйган бўлса-да, 2006 йилдан буён у учта ядро синови ўтказган. Жорий йилнинг март ойи охирида Пхенян яна «янги турдаги» ядро синовлари ўтказиши мумкинлигини маълум қилган.

Ядро дастурларидан ташқари, Шимолий Корея 2014 йилнинг бошидан буён олтмишдан ортиқ турли ракеталар учирган. Шимолдаги қўшниси томонидан бўладиган хавфга қарши тура олиш учун Жанубий Корея ҳам яқинда КХДРдаги ҳар қандай нишонни ура олувчи ракеталарни синовдан ўтказган. Бундан ташқари, Пхенян ракеталарни асосан Япон денгизи томон учираётганлигини инобатга олиб, Япония мудофаа вазири ҳам Шимолий Корея ракеталарини уриб туширишни буюрган.