Тошкентда «валютафуруш»ларнинг уюшган жиноий гуруҳи қўлга олинди. «Ҳуқуқ» газетасининг хабар беришича, уюшган гуруҳ аъзоларига тегишли автомашиналар кўздан кечирилганда, 35 млн 264 минг сўм ва 6 100 АҚШ доллари топилган. Ушбу пуллар ҳамда 3 та «Нексия» русумли автомашиналар ашёвий далил сифатида расмийлаштирилган.
Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш (СВОЖЖДЛҚК) департаментининг Тошкент шаҳар бошқармаси бўлим катта инспектори Отабек Мирасиловнинг таъкидлашича, жиноий гуруҳ 2011-йилнинг баҳор ойларидан бошлаб фаолият юритиб келган. Гуруҳда «Халқ банки»нинг Мирзо Улуғбек тумани филиали бошқарувчиси Л. Рустамов ҳам бўлган.
«Рустамов жиноий гуруҳ манфаатларини кўзлаб, А. Эшонходжаевга ўзи раҳбарлик қилаётган банкка қарашли валюта айирбошлаш шохобчаларига қачон ва қанча миқдорда валюта сотувга чиқарилганлиги ҳақида хабар бериб турган. Қолганлар эса олинган маълумотлар асосида шохобчалар олдида сунъий навбатни йўлга қўйиб, 20—30 минг сўм ‘мукофот пули’ эвазига ёлланган фуқаролар номига давлат курсида АҚШ долларини сотиб олган ва валюталарни ‘қора бозоръда юқори нархларда сотиш билан шуғулланган. Шу усулда топилган даромад гуруҳ аъзолари ўртасида тақсимланган», — дейилади хабарда.
Мабодо, гуруҳга «қарашли» валюта айирбошлаш шохобчалари олдида «бегона» одамлар пайдо бўлса, дарҳол барзанги йигитлар ва жанжалкаш аёллар ишга киришиб, турли баҳоналар билан жанжал чиқариш, керак бўлса, куч ишлатиб бўлса ҳам қўрқитиш орқали уларни навбатга киритмаслик чораларини кўришган.
СВОЖЖДЛҚК департаментининг Тошкент шаҳар бошқармаси ходимлари томонидан «Халқ банки»нинг Мирзо Улуғбек филиалига қарашли валюта айирбошлаш шохобчасида ўтказилган тадбирда жиноий гуруҳ аъзолари «мукофот пули» эвазига фуқароларни жалб қилган ҳолда валюталарни сотиб олган пайтда — жиноят устида қўлга олинган.
Мазкур ҳолат юзасидан жиноят ишлари бўйича Тошкент шаҳар суди томонидан уюшган гуруҳ аъзоларига нисбатан тегишли ҳукм чиқарилди.
Изоҳ (0)