«Ўзбекистон ҳаво йўллари» миллий авиакомпанияси 2014-йилнинг 30 мартидан баҳорги—ёзги парвозлар жадвалига ўтди. Янги жадвал миллий авиакомпания авиапарки ва муҳандис-учув таркиби имкониятлари, хориждаги вакилларининг таклифлари ҳамда маълум йўналишларга бўлган талаблар асосида ишлаб чиқилди, деб хабар берди «УзРепорт».
Баҳорги-ёзги мавсумда йўловчилар эҳтиёжини юқори даражада таъминлашга қаратилган парвозлар жадвалига халқаро йўналишлар бўйича бир қанча ўзгаришлар киритилди. Рига—Ню-Ёрк қатнови ҳафтада икки маротаба — пайшанба ва якшанба кунлари амалга оширилади. Франкфуртдан шанба куни, Париждан жума куни, Миландан эса ҳафтанинг еттинчи куни бажариладиган парвозлар юртимизнинг туристик салоҳиятини намойиш этиш мақсадида пойтахтга Урганч орқали амалга оширилади. Тошкент—Женева йўналиши бекор қилинди, аммо Тошкент—Мадрид қатнови аввалгидек қолади.
Япониянинг Нарита шаҳрига парвозлар ҳафтанинг чоршанба ва пайшанба кунлари амалга оширилиши режалаштирилган.
Миллий авиакомпания йўловчилари учун хушхабар — Сингапурга янги қатновни йўлга қўйилди. Ушбу йўналишдаги парвозлар чоршанба ва пайшанбада Малайзия пойтахти Куала-Лумпур орқали амалга оширилади.
МДҲ давлатларига эса қатновлар жадвалида янги Урганч—Волгоград йўналиши йўлга қўйилиб, парвозлар жума кунлари амалга оширилади. Шу қаторда Тошкент—Владивосток янги йўналиши бўйича ҳам қатнов режалаштирилган.
Маҳаллий йўналишларда ўзгаришлар йўқ. Авиакомпаниянинг «Баҳор—ёз—2014» парвозлар жадвали жорий йилнинг 25 октябрьига қадар амал қилади.
Изоҳ (0)