Белоруссияда деноминациядан кейин чиқариладиган пуллар ташқи кўриниши жиҳатидан евро купюрасига ўхшаш бўлади. Буни республика президенти Александр Лукашенко маълум қилмоқда, деб ёзади «Интерфакс-Запад» нашри.
«Биламан, сиз янги чиройли валюта талаб қиласиз, чунки миллионларни ҳамёнда олиб юриш оғир. Вақти келиб, биз шундай қиламиз», – деди президент, Барановичи шаҳридаги 558-авиатаъмир заводида чиқиш қилганида.
Лукашенконинг таъкидлашича, янги купюралар аллақачон зарб этилган ва омборхоналарда сақланмоқда. Деноминация ҳақида бир неча йилдан буён гапирилиб келаётган бўлса-да, Лукашенко ҳали бунинг «вақти келмаганлиги»ни айтди. «Бунинг учун иқтисодиёт ишлай бошлаши керак, муайян барқарорлик бўлиши лозим», – дея сўзига аниқлик киритди давлат раҳбари.
Аввалроқ Лукашенко деноминацияни ўтказиш вақти ҳақида ундан ярим йил аввал хабардор қилишга ваъда берган. Миллий банк бошқаруви раиси Надежда Ермакова эса, инфляция ўсишининг юқори эканлиги сабабли буни 2014-йилда амалга ошириш мушкул эканлигини айтган.
Агарда деноминация амалга оширилса, у Белоруссия тарихида учинчиси бўлади. Мамлдакатда 1994-йилнинг 20 августида ва 2000-йилнинг 1 январида ҳам деноминация ўтказилган.
Изоҳ (0)