Мадриднинг «Реал» футбол клуби Европа Чемпионлар лигаси чорак финалида Дортмунднинг «Боруссия» жамоасини йирик ҳисобда мағлубиятга учратди. «Кун»нинг хабар беришича, 2 апрел куни Мадриддаги «Сантяго Бернабеу» стадионида бўлиб ўтган ўйин 3:0 ҳисобида Карло Анчелотти шогирдлари ғалабаси билан якунига етди.
Учрашувда ҳисоб 3-дақиқадаёқ очилди. Ушбу вазиятда «Реал»нинг уэлслик футболчиси Гарет Бейл қанотдан етказиб берилган тўпни «Боруссия» дарвозасига тўғрилаб қўйди.
27-дақиқага келиб «Реал» ҳисобдаги фарқни иккитага оширди – мадридликларнинг иккинчи голи Иско ҳисобига ёзилди. Учинчи голга эса Криштиану Роналду муаллифлик қилди. У учрашув 57-дақиқасида Лука Модрич томонидан аниқ етказиб берилган пасдан сўнг немис жамоаси дарвозабонига ҳеч қандай имконият қолдирмади.
Таъкидлаш жоиз, ушбу учрашув «Реал» жамоаси ҳужумчиси Криштиану Роналду учун Чемпионлар лигасидаги 100-ўйин бўлди.
Жавоб ўйини 8 апрел куни Дортмундда бўлиб ўтади. Жавоб ўйинида «Реал» сафида Криштиану Роналдунинг майдонга тушиш-тушмаслиги ҳозирча номаълум – дастлабки ўйинда у жароҳат олганидан кейин майдонни тарк этди.
2 апрел куни, шунингдек, ЕЧЛ чорак финал дастлабки ўйинлари доирасида Парижда Франсиянинг «ПСЖ» ҳамда Лондоннинг «Челси» жамоалари ўртасидаги ўйин бўлиб ўтди. Баҳс майдон эгаларининг 3:1 ҳисобидаги ғалабаси билан якунига етди.
Ушбу ўйинда ҳам ҳисоб дастлабки дақиқаларда очилди – «ПСЖ» ҳужумчиси Исакел Лавесси 4-дақиқадаёқ «Челси» дарвозасини аниқ нишонга олди. Учрашув 27-дақиқасида «Челси» ҳужумчиси Эден Азар пеналтидан ҳисобни тенглаштирди, бироқ иккинчи бўлимда «ПСЖ» ғалабани илиб кетди.
Дастлаб, 61-дақиқада «Челси» ҳимоячиси Давид Луиз ўз дарвозасини нишонга олиб қўйиб, «ПСЖ»ни ҳисобда олдинга олиб чиққан бўлса, ўйин якунланиши арафасида майдон эгаларининг аргентиналик футболчиларидан бири Хавер Пасторе икки учрашувдан иборат босқичда муҳим аҳамият касб этиши мумкин бўлган гол муаллифига айланди.
Энди Лоран Блан шогирдлари 8 апрел куни Лондондаги «Стемфорд Бридж» стадионида «Челси» меҳмони бўлади. Икки ўйин натижасига кўра ғолибликни қўлга киритган жамоа ярим финалга йўл олади.
Эслатиб ўтамиз, 1 апрел куни ЕЧЛ чорак финали доирасида дастлабки иккита жуфтлик ўйинлари ўтказилган эди. «Барселона» – «Атлетико Мадрид» ва «Манчестер Юнайтед» – «Бавария» ўйинлари бир хил —1:1 ҳисобидаги дуранг натижа билан якунига етган.
Изоҳ (0)