Гривнанинг расмий курси янги антирекорд ўрнатди

Украина Миллий банки (УМБ) томонидан ўрнатилган гривнанинг расмий курси долларга нисбатан олганда 14 копейкага, 11,24 гривнагача пасайиши кузатилди, дея хабар беради банкнинг расмий сайти.

Шу тарзда гривна-доллар курслари нисбатида тарихий пасайиш қайд этилди. Таъкидлаш жоиз, бундан олдинги рекорд 1 апрел куни ўрнатилган эди.

УМБнинг евро бўйича курси 15,5 гривнага етганлиги ҳам кутилмаган ҳолат ҳисобланади. Охирги 2 ҳафта мобайнида евро 1,8 гривнага қимматлашди. Шунингдек, Россия рублида ҳам қимматлашиш кузатилди. Банк эндиликда 10 рубл учун 3,19 гривна нисбатини қайд этмоқда.

Банклараро валюта бозорида доллар 11,5 гривнага кўтарилди. Бу эса ўтган кун ҳолатига кўра 8 копейка кўпроқ деганидир.

Аввалроқ УМБ раиси Степан Кубив гривна курсини ушлаб туриш учунгина банклараро валюта бозорига шиддат билан кириб бормоқчи эмаслигини айтиб ўтган эди. Унинг сўзларига кўра, айни вақтда Украина валютаси «табиий ўзгаришлар жараёни’’га яқин тартибда турибди.

Йил бошида 1 долларга 8 гривна миқдорида ҳисобланган гривна курси сўнгги ойларда сезиларли даражада пасайди. Бунга асосий сабаб сифатида Украинада содир бўлган сиёсий инқироз ҳамда мамлакат халқаро захирасининг жадал суръатларда, 20 миллиард доллардан 15 миллардга қисқаришини келтириш мумкин.