Бразилиянинг Сан-Паулу штати прокуратураси «Итакеран» стадиони қурувчиларидан «бу каби иншоотларни қуришда қўйиладиган барча хавфсизлик қоидаларига амал қилиш»ни талаб қилди. Акс ҳолда, жорий йилнинг 12 июнида футбол бўйича Жаҳон чемпионати очилиш маросими бўлиб ўтадиган ушбу стадиондан фойдаланишга прокуратура тақиқ қўйиши мумкинлигини айтди, деб ёзади «ИТАР-ТАСС».
Бунга сабаб шуки, штатнинг ёнғин хавфсизлиги хизмати томонидан стадион қурилиши хусусида берилган хулосада хавфсизлик ме’ёрлари бузилишига оид жами 26 та камчилик кўрсатилган. Хусусан, «Итакеран»да ёнғин хавфсизлиги чоралари кучайтирилиши, шунингдек, фавқулодда вазият юзага келганида томошабинларни эвакуация қилишнинг бош режаси кўрсатилган бўлиши лозим.
Сан-Паулу штати ёнғин хавфсизлиги хизмати вакили Сидней Турату сўзларига кўра, «Стадион барча хавфсизлик талабларига жавоб бермайди ва ҳозирча томошабинларни қабул қилишга тайёр эмас».
«Итакеран» қурилишидаги бош пудратчи бўлган «Одебрехт» қурилиш компанияси ва стадион соҳиби бўлган "Коринтианс» клуби раҳбариятининг маълум қилишларича, барча талаблар қисқа фурсатларда бажарилади ва бу тўғрида тегишли ҳужжатлар тақдим этилади.
Изоҳ (0)