Ўтган савдо ҳафталиги (24—28 март) сезиларли даражада экспорт ҳажмининг ўсиши билан якунланди. Хусусан, «ЎзРТХБ» ОАЖ валюта савдо майдончасининг экспорт ҳажми 5,9 миллион долларни ташкил этди, бу эса олдинги ҳафта кўрсаткичига нисбатан 6 маротабага кўпдир. Бундан ташқари, валюта савдо майдончасида қайд этилган ушбу ҳафталик ҳажм жорий йил учун максимал кўрсаткич ҳисобланади.
Ўзбекистон Республикаси Товар хомашё биржаси матбуот хизматининг хабар беришича, кўрсатилган давр мобайнида 13 хорижий компаниялар биржанинг экспорт савдоларида иштирок этиб, нефт маҳсулотлари, суюлтирилган газ, полиэтилен, цемент ва минерал ўғитларни сотиб олдилар.
Харидорлар томонидан билдирилган талабнинг асосий қисми Фарғона НҚЗ маҳсулотларига тўғри келмоқда. Сотилган ушбу маҳсулотларнинг умумий ҳажми 4 миллион АҚШ доллари ёки экспортнинг 70 фоизини ташкил этди. Кузатилаётган савдо ҳафталигида ФНҚЗ 6 минг тонна саноат мойлари ва 600 тонна нефт гачини сотишга муваффақ бўлди.
Суюлтирилган газнинг экспорт бозори ҳам алоҳида эътиборга лойиқ. Унинг сотилиш ҳажми олдинги ҳафтага нисбатан уч маротабага кўтарилиб, 1 миллион АҚШ долларини ташкил этди. Суюлтирилган газнинг савдоларга чиқарилган бутун ҳажми «Шўртан Газ Маҳсулот» МЧЖ ҚК томонидан қўйилган.
Шунингдек, сезиларли даражадаги ўсиш полиэтилен бозорида ҳам кузатилган ва унинг савдо ҳажми 450 тоннани ташкил этган. Унинг экспорт таркибий тузилмасидаги улуши 11 фоизни ташкил этди.
Изоҳ (0)