Алоқа, ахборотлаштириш ва телекоммуникация технологиялари давлат қўмитасида Ягона интерактив давлат хизматлари портали фаолияти – давлат органлари томонидан аҳоли мурожаатларига муносабат ҳолати, жорий қилинаётган интерактив хизматлар таҳлили, мавжуд камчиликларни бартараф қилиш борасидаги чора-тадбирларга бағишланган муҳокама ташкил этилди. Муҳокамада бир қатор вазирлик ва давлат органлари масъул раҳбарлари ва мутахассислари иштирок этдилар. Бу ҳақда қўмита матбуот маркази хабар берди.
Тадбирда Ягона портал фаолияти ҳар томонлама, хусусан танқидий ўрганиб чиқилди. Хусусан, фуқаролар томонидан Ягона портал орқали вазирлик ва давлат идораларига юборилаётган аҳоли мурожааталарига ўз вақтида муносабат билдирмаслик ҳолатлари таҳлил қилиниб, тегишли давлат органларига бу бўйича тезкор чора-тадбирларни амалга ошириш бўйича тавсиялар берилди.
Шунингдек, давлат ва хўжалик бошқаруви органлари томонидан фуқаролар мурожаатларига нисбатан билдирилаётган муносабат – жавоб хатларининг сифатига ҳам тўхталиб ўтилиб, Ягона портал орқали келиб тушган фуқаро мурожаатларига нисбатан баъзи бир давлат идоралари томонидан тақдим этилаётган аксарият маълумотлар аҳоли томонидан қониқарсиз, деб ҳисобланаётгани таъкидланди.
Давлат ва хўжалик бошқаруви органларига мазкур масалаларни ўз вақтида бартараф этиш, Ягона портал орқали келиб тушаётган аҳоли мурожааталарига ўз вақтида ва юқори даражада муносабат билдириш бўйича чора-тадбирларни қабул қилиш юзасидан тавсиялар берилди.
Йиғилиш доирасида тадбиркорлик субектларига кўрсатилаётган хизматлар сифати ва сонини янада ошириш масалалари ҳам алоҳида ўрганиб чиқилди.
Вазирлик ва давлат идоралари вакиллари томонидан аҳоли ва тадбиркорлик субектларига кўрсатилаётган электрон хизматлар, Ягона портал орқали тақдим қилинаётган интерактив хизматлар, мурожаатларни кўриб чиқиш ҳолати, бошқарувда АКТни жорий қилиш бўйича таҳлилий маълумотлар, қарашлар ва мулоҳазалар, янги лойиҳалар ва жорий қилиниши режалаштирилган хизматлар хусусидаги тақдимотлари билан чиқиш қилдилар.
Йиғилиш якуни бўйича Давлат алоқа қўмитаси томонидан Ягона портал орқали келиб тушган мурожаатларни вазирлик ва идораларнинг ҳафталик йиғилишларида танқидий кўриб чиқилиши тавсия этилди ҳамда 2014-йилнинг иккинчи чорагида аҳоли ва тадбиркорлик субектлари учун жорий қилиниши кўзда тутилган интерактив давлат хизматларининг аниқ рўйхатини белгилаш ва ишларни ҳамкорликда ташкил этиш келишиб олинди.
Изоҳ (0)