Аввал хабар берганимиздек, Американинг собиқ махсус хизмат ходими Эдвард Сноуден 16 июль куни Россия Федерациясининг Федерал миграция хизматидан расмий тарзда вақтинчалик бошпана сўраган эди. Бугун «РИА Новости» агентлигига асосланиб, Gazeta.uz маълум қилишича, Сноуден Россиядан бир йиллик муддат билан вақтинчалик бошпана олди.
«Шереметево» транзит ҳудудида бир ойдан ортиқ вақт давомида кун ўтказган собиқ агент аэропортни тарк этди. Унинг адвокати Анатолий Кучерена сўзларига кўра, Сноуден аэропортдан якка ўзи таксига ўтириб кетган. «Мен уни кузатиб қўйдим, у хавфсиз жойга кетди», — деб қўшимча қилди адвокат.
Маълум қилинишича, Сноуден Россиядан бир йил муддатга бошпана олган. Энди эса у Федерал миграция хизмати бўлимларидан бирида рўйхатдан ўтиши керак бўлади.
Эдвард Сноуден Америка махсус хизматларининг бутун дунёдаги интернет фойдаланувчиларини кузатиб бориш имконини берувчи дастур ҳақида ОАВга ошкор қилган эди. У АҚШдан қочиб, Гонгконг орқали 23 июнь куни Москвага келган ва шундан буён «Шереметево» транзит ҳудудида яшаб келган. Бироқ унинг Америка паспорти бекор қилингани сабабли аэропортни тарк эта олмайотган эди. Июль ойи ўрталарида эса собиқ агент Россиядан сиёсий бошпана сўрамоқчи эканлигини маълум қилган эди.