Қирғизистонда Тошкент вақти билан соат 19:00 да (маҳаллий вақт билан 20:00) парламент депутатлиги сайловлари якунига етди. Бу ҳақда «Интерфакс» хабар берди.
Қирғизистон вақти билан соат 18:00 ҳолатига кўра овоз бериш жараёнларида 1 миллион 50 минг 163 нафар фуқаро ёки сайловчилар умумий сонининг 28,36 фоизи иштирок этган. Ягона сайлов округидаги рўйхатларга жами 3 миллион 703 минг 420 нафар фуқаро киритилганди.
Сайловларда иштирок этиш учун 2 494 та сайлов участкаси шакллантирилди, шундан 59 таси мамлакат ҳудудидан ташқарида хориж давлатлари ҳудудида тузилган. Энг охирги сайлов участкаси душанба куни АҚШнинг Чикаго шаҳрида маҳаллий вақт билан 08:00 да (Тошкент вақти билан 09:00 да) ёпилади.
Қирғизистон парламенти таркиби 90 нафар депутатдан иборат ва улар беш йил муддатга сайланади. Аралаш сайлов тизимига кўра 54 нафар депутат пропорсионал тизим бўйича ягона сайлов округидан сайланади (сиёсий партиялар рўйхатидаги номзодлар), 36 нафар депутат эса бир мандатли сайлов округларида овоз бериш йўли билан сайланади.
Сайловларда иштирок этадиган сиёсий партиялар парламентга кириш учун 5 фоизлик «довон»дан ўтиши талаб этилади. Бир мандатли округлардаги номзодлар энг кўп овоз тўплаши зарур.
Қирғизистонда сайлов тўғрисидаги қонунга кўра сайловлар амалга ошганини тасдиқлаш учун рўйхатга олинган сайловчиларнинг муайян фоизи қатнашгани аҳамиятга эга эмас.
Қирғизистон марказий сайлов комиссияси берган маълумотларга кўра парламент сайловларида 50 фоиздан ортиқ бюллетенлар ўрганиб чиқилганидан кейин «Ота юрт Қирғизистон» партияси (айни вақтда мамлакатдаги ҳукмрон партия) етакчилик қилмоқда.
Онлайн тарзда янгиланиб турган ахборотларга (Тошкент вақти билан 19:00 ҳолатига кўра) мувофиқ «Ота юрт Қирғизистон» партиясига 30 фоиз сайловчилар овоз берган.
Иккинчи ўринда 24,23 фоиз овоз билан «Ишеним» («Ишонч») партияси, кейинги ўринларда эса «Интимак» («Розилик») 20,5 фоиз ва «Альянс» 14,6 фоиз бормоқда.
Сайловларда 5 фоизлик «довон»дан ўтиши мумкин бўлган партиялар қаторига эса «Бутун Қирғизистон» 11 фоиз, «Имон нури» 10 фоиз, «Эл умиди» 8,8 фоиз, «Озодлик» 7,69 фоиз, Социал-демократлар 6,18 фоиз ҳамда «Ота Макон» 6,4 фоиз кирган.
Бир йил аввал октябрь ойида Қирғизистонда парламент сайловлари бўлиб ўтган, кейинчалик Қирғизистон Марказий сайлов комиссияси Бишкекда оммавий норозилик намойишлари бошланишига сабаб бўлган парламент сайловлари натижаларини ҳақиқий эмас деб топганди. 2021 йил августда Қирғизистон президенти Садир Жапаров 28 ноябрь куни Республика парламенти депутатлари сайловини ўтказиш тўғрисида фармонни имзолаган.
Изоҳ (0)