Октябрь ўрталарида Фарғона вилоятининг Сўх туманида аэродром қурилиши якунлангани, яқин кунларда синов учишлари амалга оширилиши тўғрисида хабар берилганди. «Дарё» мухбирининг Сўх тумани ҳокимлиги ахборот хизмати раҳбари Анвар Жўраевга таяниб, маълум қилишича, 1 ноябрь куни синов парвози Humo Air авиакомпаниясига қарашли Ан-2П йўловчи ташиш самолётида амалга оширилган.
Маълум қилинишича, маҳаллий вақт билан соат 12:30 да Фарғона халқаро аэропортидан ҳавога кўтарилган Ан-2П самолёти соат 13:10 да Сўхдаги аэродромга келиб қўнган. Илк парвоз аҳоли ва кенг жамоатчилик вакиллари томонидан катта тантана билан кутиб олинган. Шу куннинг ўзида самолёт Сўхдан Фарғонага парвоз қилган ва соат 14:07 да Фарғона халқаро аэропортига етиб келган.
Эслатиб ўтамиз, Ўзбекистон Президентининг «2020–2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари тўғрисида»ги қарорида Сўх туманида самолёт ва вертолётлар учун учиш-қўниш майдончалари ташкил этилиши белгиланган эди. Парвозлар учун Ан самолётлари ва Ми-8 вертолётларидан фойдаланиш режалаштирилганди.
Маълумот учун, туманга кичик авиация транспорти қатновини йўлга қўйиш мақсадида «Навобод» маҳалла фуқаролар йиғини ҳудудида самолёт ва вертолётлар учун учиш-қўниш майдончаси ташкил этилган. Учиш-қўниш майдончасининг узунлиги 650 метр ва эни 100 метр бўлган мазкур аэродром қурилиши учун қарийб 7 гектар ер майдони ажратилган.
Қурилиш ишлари учун 6 миллиард 800 миллион сўм маблағ ажратилиб, кутиш зали, овқатланиш шохобчаси, савдо нуқтаси, дам олиш жойларини ўзида қамраб олган замонавий мажмуа бунёд этилган.
Изоҳ (0)