Европада бу йил бутун кузатувлар тарихидаги энг иссиқ ёз бўлди. Бу ҳақда Европа Иттифоқи иқлим ўзгариши хизматининг «Коперник» дастури маълумотларига таяниб, Deutsche Welle хабар берди.
Дастур маълумотлари шуни кўрсатдики, жорий йилнинг июнидан августигача бўлган ўртача ҳарорат 1991—2020 йиллардаги ўртача ҳароратдан деярли 1 даража юқори эди.
Бу иқлим ўзгаришини кузатиш хизматининг 1950 йилдан бери ишлаётган маълумотлар базасида қайд этилган энг иссиқ ёз. Италия, Греция, Туркия ва Испания каби Ўрта ер денгизи мамлакатларида ҳарорат айниқса юқори бўлган.
Август ойида Италиянинг Сицилия минтақасида ҳарорат 48,8 даражага етди, бу Европанинг бутун кузатувлар тарихидаги энг юқори ҳарорат.
Ушбу маълумотлар Европада ёзда содир бўлган кўплаб об-ҳаво ҳодисаларидан кейин нашр этилди. Кучли жазирама пайтида нафақат Италия, Греция, Туркия ва Испанияда, балки Франция, Португалия ва Россияда ҳам ёнғинлар келиб чиқди.
Айни пайтда Германия, Бельгия ва бошқа бир қанча Европа мамлакатлари сўнгги ўнлаб йиллар ичидаги энг даҳшатли сув тошқинини бошдан кечирди, уларнинг оқибатида жами 242 киши ҳалок бўлди. Олимларнинг фикрича, об-ҳавонинг кескин ўзгаришига глобал исиш сабаб бўлган.
Аввалроқ БМТ иқлим ўзгаришининг кескин оқибатлари ҳақида огоҳлантирувчи ҳисоботини эълон қилганди. Унда таъкидланишича, ҳароратнинг кўтарилишига антропоген (инсон омили билан юзага келган) чиқиндилар сабаб бўлгани инкор этилмайди, улар аллақачон бутун дунё бўйлаб экологик офатларга олиб келган.
Шунингдек, олимлар Арктикада ҳаво ҳарорати сайёранинг бошқа минтақаларига қараганда тезроқ қизиётганини маълум қилганди. Бу жараён эса сайёрадаги об-ҳаво учун салбий оқибатларга олиб келиши мумкин.